Ehangano lyaNord itali futu aaniilonga

Aaniilonga yamwe yehangano lyoNord security mOndangwa inaya mona oondjambi dhawo uule woomvula mbali dha piti, yamwe inaya futwa uule woomwedhi ne nenge mbali.

Metitatu lyoshiwike sha piti aaniilonga oya konga omayamukulo okuza komugandji gwawo gwiilonga.

Oya popi kutya okwaahamona oondjambi dhawo okwa ninga omukundu omunene kuyo molwaashoka oyendji ngashiingeyi oye na oondjo odhindji.

Paulus Immanuel okwa popi kutya aluhe taya pula oondjambi dhawo ohaya lombelwa kutya kape na iimaliwa.

“Otu na aanona mboka haya yi kooskola na otwa pumbwa okuyambidhidha aanona mboka ihe itatu vulu molwaashoka ihatu futwa,” Immanuel a popi.

Aaniilonga oya popi kutya ehagano otali ya ningile owala omauvaneko ngoka itaga gwanithwapo omanga yo itaya vulu okupalutha oofamili dhawo.

Mwene gwongeshefa ndjoka, Willem Liebenberg, okwa lombwele oNamibian Sun kutya oku na ontseyo yuupyakadhi mboka na otaku ningwa oonkambadhala opo wu kandulwepo.

Liebenberg, okwa popi kutya uupuyakadhi mboka otawu etithwa kaayakulwa yawo mboka itaya futu.

Okwa popi kutya okwa tegelela natango omuyakulwa gwe gumwe ngoka a tegelelwa a fute oshimaliwa sha thika poo N$200 000.

“Otu na aayakulwa mboka ye na oondjo dhetu na otaya kwata ethimbo okufuta naashoka osha etitha kandi vule okufuta aaniilonga ayehe,” Liebenberg a popi.

Liebenberg okwa uvaneke taka konga ekwatho kombaanga na okwa pula aaniilonga yiidhidhimike.

Okwa popi kutya okuuvite olune naaniilonga ihe ke na nkene omolwa ompumbwe yiimaliwa.

Aaniilonga mehangano ndyoka oye wete taku ningwa woo okatongo molwaashoka aaniilonga yamwe ohaya mono oondjambi dhawo komwedhi omanga yamwe ihaya mono sha.

Omunambelewa omupopiliko guuministeli waaniilonga, Maria Hedimbi okwa popi kutya aaniilonga oya gandja omanyenyeto gawo kuuministeli mOndangwa.

Hedimbi okwa popi kutya okwa ninga omutumba na mwene gwehangano ndyoka na okwa uvaneke okufuta iifuta ayihe okuya pehulilo lyaFebruali.