Aashomeya taya lundile aanambelewa yamuni moshikumungu shokuya miihulo mepingathano nevi

Aakalimo yomOshomeya otaya ti aanambelewa yamuni ota ye ya pula opo ya ye nayo miihulo nayo mepingathano lyooplota (lyevi).

Shi ikolela kAashomeya, okupulwa kombinga yokuya miihulo naanambelewa, limwe lyomomatompelo ya tokola opo ya ka yunge ontanda yawo poombelewa dhamuni mOmaandaha elalakano opo ya gandje omakemo gawo.



Mboka taku hokololwa ye li moshikumungu shika omwa kwatelwa aakwashigwana yamwe mboka ye li mokakomitiye kokutopola nokutenda ooplota momalukanda, unenenene moKuvukiland popepi nOshomeya.

Omalundilo ngaka oga nyolwa momukandakemo gwomomasiku 5 Novemba 2024 gwa nyolelwa muni nUuministeli wOmapendulopo gIilando nOmikunda. Aashomeya, mewiliko lyomunandjungu Lichen Claasen, oya pele muni oshiwike opo a kale a tya ko sha komakemo gawo, ashike otashi ulike kutya omakemo gawo inaga talwa sha.



Ta popi ohela, Claasen ina ongaonga mokuhokolola natango omahokololo taga adhika momukandakemo.



“Oshinima shoka tashi kumitha noonkondo osho shoka kutya aanambelewa yamwe yamuni gwaShomeya oya kwatelwa mo moshikumungu shokulanditha ooplota shaa li paveta kaakalimo mboka yaa shi po sha. Oshilyo shimwe shokomitiye yokoKuvukiland okwa ti ota pe omukiintu oplota ngele a yi miihulo naye,” omukandakemo tagu lesha.



Claasen ota ti kutya oku na uumbangi tau koleke omapopyo ngaka nota vulu oku wu gandja kumuni noshowo ku Erastus Uutoni, minista gwomapendulopo giilando nomikunda.



Kombinga yehololomadhiadhilo ndyoka tali kala ko mOmaandaha, Claasen okwa holola kutya aakalimo itayi zi po poombelewa dhamuni sigo ya popi nUutoni nonOmuhogololwa-presitende Netumbo Nandi-Ndaitwah.



“Itatu zi po poombelewa dhamuni ngele inatu mona Nandi-Ndaitwah naUutoni,” okwa ti.



Aahololimadhiladhilo oya indilwa ye etelele komunyanyo ootenda, omapakete, oombiga, uusindo, uuyaha, uundini womeya nomakumbatha.



Mayola gwondoolopa yaShomeya Mathews Hangula okwa koleke kutya elelo olya tseya kombinga yehololomadhiladhilo ndyoka.



Etopolo lyevi lyaa li pauyuuki



Omukandakemo otagu holola wo kutya etopolo lyevi kali li pauuyuki mOshomeya. Omanga aakalimo yamwe yomomalukanda, ngaashi Kuvukiland, taya thiminikwa konkalo opo ya kale mothina – muumbashu wumwe hamu zi aantu 24- aanangeshefa ya za kiitopolwa yilwe anuwa oye na omahala omanene.



“Kashi li pauuyuki nande kaanegumbo 24 ye li megumbo limwe moKuvukiland, ashike muni ota vulu okulanditha omahala omanene kaanangeshefa, yamwe mboka yaa shi yomOshomeya?” Claasen a konenene.



Okwa gwedha po kutya aahololimadhiladhilo oye na uumbangi wokatongo haka noya tokola ya gandje uumbangi mbuka ku minista nokomuhogololwa-presidente.

Omeya omawinayi



Claasen okwa nyana wo edhiladhilo lyamuni lyokugwedhela ondando yiifuta yomeya nonande muni e shi shi kutya omeya oga kaka.



“Ipula owala, kutya oya li ya hala okugwedhela ondando yiifuta yomeya nonande ye shi shi kutya ihatu nu omeya ga yela. Ohatu landa omeya moostola opo twaa ehame, ashike oya hala okugwedhela ondando yiifuta yomeya. Itatu ka pitika nande ye shi ninge,” okwa ti.



Konima yoomvula mbali, momeya gomondoolopa yetu omwa adhika obakiteli yoClostridium. Okuza mpoka, epangelo oli indile uuministeli namuni gwaShomeya opo ya longele kumwe mokukandulapo omukundu ngoka.



Mumvogu, Mayola gwondoolopa yaShomeya Mathews Hangula okwa tseyithile oshikundaneki shoNamibian Sun kutya elelo olya li li ipyakidhila nokutunga ehala lyokudhinda omeya nelalakano okukandula po omukundu ngoka. Pokati mpoka, aakalimo oya kumagidhwa ya fulukithe omeya gawo manga inaye ga nwa nenge ya lande omeya moostola.



Aakalimo oya holola wo omalimbililo gawo kombinga yaanambelewa yamuni taya kutwa popoosa mpoka yaa na uulongelwe tau opalele.



Oya konenene elangeko lyomukuluntupitithi gwondoolopa ta kwathele Frans Enkali, taya ti elangeko lye olya thindila kongudhi aakongi yiilonga yamwe.