Aasamaria aanamutimahenda ya gongele N$10 000 ya fumvike omukiintu kaa li e na olukalwa

Aakalimo yamwe yomoEros mOvenduka oya gongele oshimaliwa opo ya gandje esimaneko lyahugunina komukiintu a valelwa moSouth Africa ngoka a kala nokwa sile moNamibia muKotoba.



Susanna Willemse (67) okwa tembukile moNamibia mo1989 ta kongo uuhupilo wu li hwepo. Okwa si muKotoba, konima yomasiku gahamano sho a dhana evalo lye eti- 67, naashika osha ningwa konima yuuwehame.



Willemse okwa tseyika nawa pomudhingoloko gwawo ongo a li ha longo nuudhiginini nomunamutimahenda, nonande a kala muudhigu, omuyapostoli David Kapuka a ti.



Kapuka gumwe gwomaakwashigwana mboka ya yambidhidha Willemse, noye a li omuwiliki gwoshituthifumviko shaWillemse.



Okwa ti aakalimo yomOvenduka oya yambidhidha Willemse mpoka taya vulu niikulya niipumbiwanima yakwalukehe.



"Okwa li omuvali kaa ki e na olukalwa noka li ha longo ashike okwa hupu kekwatho lyetu," Kapuka a ti.



"Omathimbo gamwe, okwa yogo ko kiikutu yetu opo a mone okamaliwa."





Taya kongo omakwatho





Moonkalo ngaandhika, uuna omuntu kee na olukalwa ye omukwiilongo, ndohotola Omunamibia, ngoka inaa hala okutumbulwa kedhina, okwa fatulula omifango hadhi landulwa: "Ngele nakusa okwa sile megumbo, Opolisi yaNamibia ohayi tseyithilwa yi ile po omudhimba yi gu fale kokila yopopepi.



“Kokila, oondohotola ohadhi konakona ngele eso olyopaushitwe nenge kali shi lyopaushitwe. Ngele yeso lyopaushitwe, onzapo yeso ohayi gandjwa, opo aakwanezimo ya vule okuninga omalongekidho gefumviko.”



Ndohotola ota ti moompito ndhoka eso kaa li shi lyopaushitwe, omudhimba ohagu tandwa ku monike osheetithi sheso tango.



Shampa omudhimba gwa tandwa nosheetithi sheso she ya puuyelele, omudhimba opo hagu ethelwa miikaha yaakwanezimo. Ngele nakusa ke shi OmuaNamibia, nomudhimba ogwa kala mokilla ethimbo inaagu ilwa mo, Opolisi yaNamibia otayi vulu okukwatathana nombelewakalelipo-shilongo hoka kwa yambukile nakusa opo yi ya kwathele mokukonga aakwanezimo, ndohotola ta ti.



Kapuka ta ti sho Willemse kaa li nuuthemba woshilongo niiyemo yothaathaa, noka li ha yambidhidhwa lela komwanamati awike ngoka ha longo, oya pula ekwatho kepangelo lyaNamibia.





Pakwatho lyoshigwana, omwanamati gwanakusa gwoomvula 27 okwa pewa onzapo yayina yevalo yi na omauyelele agehe ndjoka ya zi kombelewakalelipo-shilongo yaSouth Africa.



Onzapo ndjika yevalo yanakusa, oya kwatha opo aakwanezimo ya pewe onzapo yeso. Shoka she eta, opo ya pewe epitikilo lyokufumvika nakusa Willemse.



Kapuka ota ti ehangano lyoOne Economy Foundation olya gandja uushako utatu womamacoroni gookilohalama ndatu, omanga ombelewa yakamunsela oya gandja uusila wepungu nonyama yomoondooha.



Ota ti yalwe oyendji inaya vula okuya kwatha.



"Sho a hulitha mo 14 Kotoba, otwa koonkola poombelewa odhindji opo dhi tu kwathe, mwa kwatelwa Ombelewa yomunyekadhi omukulu gwoshilongo [Monica Geingos], ehangano lyoOne Economy Foundation, ombelewa yaKamunsela mOvenduka, Uuministeli wUukashikekookantu, Ekandulopo lyOluhepo nOnkalo nawa, noombelewa dhilwe."



Shoka oshe eta opo oshigwana shi wayimine aakwanezimo, opo shi gongele oshimaliwa molwa efumviko.



"Ongookuume naashiinda, otwa gongele po N$10 000 ga ka lande oshiketha, okufula nokunga kombila nokutula ko emanya," ota ti.



MOlyomakaya 26 Kotoba, Kapuka ota ti oya thindikile lwahugunina Willemse nesimaneko.