Aanambelewa aape mOkabinete okape

Omahokololo otaga uvikila mpaka naampeyaka kutya minista yiimaliwa Ipumbu Shiimi ota ka ninga omuprima gwaNamibia, ta pingene po Saara Kuugongelwa-Amadhila, ngoka taku hokololwa taku dhiladhilwa a ka ninge omunashipundi gwOmutumba gwoPashigwana. Okabinete okape okwa tegelelwa ka holololwe oshigwana moshiwike tashi ya.

Shi ikolela koonzo dhi shi okwiinekelwa, opoosa yaShiimi kuuministeli wiimaliwa otayi ka kuthwa po ku Ester Kali, Omukuluntupitithi gwombaanga yoLetshego Namibia.

Kali, ngoka a longele Letshego okuza moma2014 konima yoomvula 27 dhokulongela ombaanga yoFNB Namibia – hoka a li omukuluntu gwoshikondo shokumbaanga kwaanangeshefa – okwiitaalwa kutya oye gumwe gwomiilyo yOmutumba gwoPashigwana iihetatu mbyoka ihaya hogolola mbyoka tayi ka ulikwa komupresidente omupe Netumbo Nandi-Ndaitwah.

“Ondungethaneko yongashingeyi oya tokola kutya kehe gumwe ngoka taka ulikwa maaulikwa yahetatu ota ningi ominista, oshoka momusholondondo gwiilyo yOmutumba gwoPashigwana gwongashingeyi kamu na naanaa aantu oyendji taya opalele okuya poopoosa ndhoka,” onzo ye shi holola ohela.

Oonkambadhala dhokukwatathana naKali, opo a tye ko sha, odha hulile muunyengwi.

Shiimi ohela okwa ti kutya ye ke na owino washa womalunduluko miilonga ye, ngoka taga fofodholwa koyendji, okwa lombwele Namibian Sun kutya: “Okupopya oshili, kandi na owino washa mwaashoka.”

Omusholondondo gwomadhina

Aakwaswapo oya ti omusholondondo gwiilyo yOmutumba gwoPashigwana gwongashingeyi itagu hokitha naanaa, naashoka anuwa osho tashi thiminike Nandi-Ndaitwah a konge aanawino mboka yaa shi aanapolitika, opo ya ka wilike omauministeli ga simana.

Mokati kaamboka taku hokololwa taya ka ninga oominista omwa kwatelwa Charles Mubita, oshilyo shoPolitburo yoSwapo nomundohotola miipambele yopaigwana okuza koUniversiti yaSouthern California. Mubita, ngoka monale a li omunambelewa omukuluntu koshikondo shoonkundana niiningwanima yopethimbo mehangano lyokutuma omawi mombepo lyopashigwana(NBC), otaku fofodholwa kutya oye ta ka ninga ominista yomauyelele. Kakele, Mubita okwa holola onkumwe ye komitotolombo ndhika ohela, ta ti: “Kandi na uuyelele mwaashoka. Opo tandi shi kundana lwotango kungoye ngeyi.”

Mubita gumwe gwomaanelago ya hogololelwa moparliamente okupitila momahogololo gomuNovemba mumvogu.

Pokati mpoka, Omukuluntupitithi gwehangano lyoLüderitz Waterfront Development Company, Fluksman Samuehl, otaku tiwa kutya okwa nothelwa ko kutya oye taka ninga amushanga gwoKabinete, ta pingene po George Simataa, ngoka tayi moshipundi shevululuko. Kakele, Samuehl, okwi ikala kutya okwa yakula ontuwafo ya za kepangelo.

“Inandi pewa opoosa yUuamushanga woKabinete tau ya,” okwa ti ohela.



Okabinete okape

Omalunduluko ngaka otaga etwa konkalo yomalunduluko omanene ge li mongundu tayi pangele yoSwapo. Oominista 16 dhomokabinete kongashingeyi inadhi hogolululwa dhi shune mOmutumba gwoPashigwana, omanga dhilwe, mwa kwatelwa Kalumbi Shangula (uundjolowele), John Mutorwa (iilonga), Doreen Sioka (uukashikekookantu) naCalle Schlettwein (uunamapya), oya holola kutya otaya ka ya moshipundi shevululuko. Onakuyiwa yopapolitika yaminista Yvonne Dausab inayi yela manga, oshoka ina kutha ombinga moshigongiilonga shokuhogolola iilyo yOmutumba gwoPashigwana iipe oshikwawo ina holola ngele otaka thiga po iilonga.

Moshiningwanima oshikumithi, ominista onkulu yomavi Alpheus !Naruseb anuwa ota dhiladhililwa a ninge omupevi-presidente. Ekwatelomo lya!Naruseb momusholondondo gwaNandi-Ndaitwah gwomumvogu gwaaulikwa 10 taya ka ya moparliamente olya kumitha oyendji, oshoka !Naruseb okwa li ikutha miilonga mo2020 noka li naanaa we hakutha ombinga mopolitika.

Omusholondondo gwoominista oonkulu omugoyi ndhoka kaa dhi mo momusholondondo gwiilyo yOmutumba gwoPashigwana omwa kwatelwa Peya Mushelenga (omakwatathano gopaigwana), Tom Alweendo (oomina niikwankondo), Itah Kandji-Murangi (elongo lyopombanda), Frans Kapofi (egameno nepopilo), Utoni Nujoma (aaniilonga), Christine //Hoebes (ombelewa yOmupresidente), Erastus Uutoni (omapendulopo giilando nomikunda), Obeth Kandjoze (okakomisi komathaneko gopashigwana), naAnna Nghipondoka (elongo lyopevi).

Onzo yi li popepi nomupresitende oya ti: “Netumbo oku li muudhigu wokukambadhala okunyanyudha kehe gumwe, naashoka itashi piti (vulika) molwa iizemo yankudipala yongundu yoSwapo momahogololo gomuNovemba mumvogu. Oominista dhimwe oonkulu odha lombwela dhi ilongekidhile oku ka kala aakaleliposhilongo kiilongo niilongo.”