Aanamapya ya kunkililwa ya longekidhe omapya gawo kuyele

Sha landula omuloka iiwike ya piti, Ngoloneya gwoshitopolwa shaZambezi, Lawrence Sampofu oshowo Ngoloneya gwoshitopolwa shaKavango East, Bonifatius Wakudumo, oya pula aanamapya mboka inaya tameka natango okulongekidha omapya gawo opo ya tameke.

Sho a popi nEwi lyaNooli, Sampofu okwa okwa pula aanamapya mboka inaya pyakudhukwa natango ya tegelela omuloka guli nawa opo ya tameke okulongekidha omapya gawo omanga ethimbo inali pwapo.

Okwa popi kutya onkalo ndjoka otashi vulika yi ka etithe onkalo ndjoka ya holoka kuyele nuumvo sho omuloka gwa pu ko muJanuari naanamapya yamwe oya ndopa okumona iipalutha ya gwana okuzilila momapya gawo.

“Otwa mona omuloka guli nawa. Yamwe oya tameka nale okupulula. Shoka tandi vulu okutya owala mboka inaya tameka oya pumbwa okutameka molwaashoka kuyele nuumvo okwa li twa tegelele kutya omuloka guli nawa opo tagu ya ihe omvula oya hulile muJanuari,” Sampofu a popi.

Nale omuloka ogwa li hagu tameke muKotomba ihe mongashiingeyi omuloka gwa nkundipla otagu shololitha aanafaalama.

Sho a ningilwa omapulo, Wakudumo okwa pandula aanafaalama mboka ya tameke nale okulongekidha omapya gawo.

Okwa popi kutya ope na iilonga yimwe ya pumbwa okuningwa momapya omanga aantu inaya tameka okupulula, ngaashi okuwapaleka omapya.

“Otandi indile aanafaalama ya tameke okulonga momapya gawo na inaya tagelela omvula. Katu shi kutya omvula otayi ya uunake na ngele otwa tegelele nena otashi vulika tu ka kale twa lata uuna omvula ye ya,” Wakudumo a popi.