Aaiyambi ya nyolitha oonakupewa N$600 inaya futwa natango

Ongundu yaaiyambi koRundu mboka taya ti oya li ya tumwa opo ya ka kwathele mokunyolitha oohandimwe mboka ihaya longo, opo ya pewe oshimaliwa shoN$600 shokwiikwatha nasho. Otaya ti uuministeli mboka wa li hau ithanwa wuukaskikekookantu, ekandulopo lyoluhepo nonkalo nawa yoshigwana anuwa owa ndopa okuya futa ngaashi wa tile otau shi ningi.

Aaiyambi mbaka otaya ti oya longele uule wiiwike itatu, okuza momasiku 5 sigo 21 Desemba 2024, noya li yu uvanekelwa taya futwa momasiku 23 Desemba. Ngashingeyi, konima yoomwedhi dha konda pundatu, otaya hokolola kutya inaya futwa natango.

Gumwe gwomaaiyambi ngoka inaa hala okutumbulwa kedhina, mOmaandaha okwa ti kutya aaiyambi oya kala nokukonga omayamukulo ihe inaye ga mona.

“Iha yakula oongodhi dhetu shampa tatu dhenge, nuuna ye shi ninga, ohaye tu lombwele owala iinima yaa na omutse nandungu,” omwiiyambi a hokolola.” Oye tu uvanekele kutya shaashi otwa kwathela momainyolitho, ofuto yetu otatu yi pewa tango, ashike shono inashi ningwa nande. Kape na naangoka ha ti ko sha kombinga yofuto yetu.”

Aaiyambi otaya ti onkalo ndjika oye ya tula muudhigu.

Yamwe oya hehela aantu iimaliwa yolefa opo ya ye kiilonga mbika, omanga yamwe oya longitha iimaliwa yaavali yawo mbyoka ya totithe nokupatululitha omayalulilombaanga netegameno kutya otaya ka futwa oshimaliwa shawo.

“Otwa longa oowili noowili, omasiku gamwe okuza po07:00 sigo opo18:00, ashike ngashingeyi inatu futwa sha natango,” omwiiyambi omukwawo a ti. “Oshiyemateka okutala aantu mboka twa nyolitha ya pewa oshimaliwa shawo omanga tse inaatu pewa sha.”

Kape na omayamukulo

Moshikando shahugunina sho ya popile nomukuluntu gwawo miilonga, anuwa oya lombwelwa kutya opolohalama yoshimaliwa shokwiikwatha nasho otayi lundululilwa kuuministeli wumwe – nosho she etitha ekateko ndika.

“Kehe ethimbo tatu dhenge, ohaya ti aanambelewa oye li mefudho nenge ka ye mo moombelewa. Omuntu ota vulu ngiini okukala mefudho okuza mu Desemba sigo omuMaarsa?” omwiiyambi gumwe a pula.

Namibian Sun okwa kwatathana naangoka a li ta tonatele ongundu ndjika Kay Strauss, ashike okwa tindi okutya ko sha.

“Dhengeleni omunambelewa gwomakwatathano; itandi vulu okutya ko sha peha lyuuministeli. Iikumungu ayihe nomakemo agehe ohaga ungaungiwa nago komunambelewa gwomakwatathano.”

Sho a kwatakaniwa naye opo a tye ko sha, omupopiliko gwuuministeli Lukas Haufiku mOmaandaha okwa ti:

“... osha simana okukoneka kutya omauministeli gamwe oga tulwa mumwe, niinakugwanithwa oya lundululilwa komaunimisteli gamwe. Ongoshizemo, oshikumungu shika osha gwila ngashingeyi muuministeli wuukashikekookantu. Otatu ka kala moshigongi oshiwike tashi ya tu ka kundathane oshikumungu shika notatu ka yamukula omapulo agehe.”