Aahungimwenyo inaya kwatha okakadhona ka ‘kwatwa koonkondo’ komumwayinamati

Okakadhona koomvula 12 komomukunda Mukekete moshikandjohogololo shaTondoro moshitopolwa shaKavango Uuningino, inaka hungwa omwenyo kaahungimwenyo sha landula sho ka kwatwa onkonga komumwayinamati gwoomvula 20 mEtitano lyoshiwike sha zi ko.

Omuvali gwokakadhona haka ka kwatwa onkonga okwa lombwele oshifo shoNamibian Sun kutya okamwanakadhona oka kala megumbo mehuliloshiwike lyaPaasa inaa ka pangwa noinaa ka hungwa omwenyo.

Okakadhona haka oka falwa kOshipangelo shEpangelo shaNkurenkuru mEtiyali, konima yomasiku gane okuza kesiku lyoshiningwanima.

"Oye ka wende noku ka kutha ombinzi nomasita – ga ka konakonwe,” omuvali a fatulula.

“Ashike kape na omuhungimwenyo i ile pokamwandjekadhona a popye nako, noshikondo shegameno lyoomeme naanona mopolisi nasho inashi tseyithilwa," okwa gwedha po.

Okwa koleke kutya konima yoshiningwanima shika shekwatonkonga, okamwanakadhona inaka hungwa omwenyo kaanawino, onkalo ndjoka tayi mu ipulitha nayi kombinga yonkalonawa yokamwanakadhona.

“Sigo okeluwa ndika, kape na ngoka e ya e ka hunge omwenyo nenge a popye nako kombinga yaashoka sha ningwa po. Okanona kake ku uvite nawa. Okamwandje ka ke li nawa, noka pumbwa ekwatho shili,” okwa ti.

Ekwatho lyomeendelelo lya pumbiwa

Aanambelewa yuundjolowele otaya dhenge omuthindo kutya osha simana opo omakwatho gomeendelelo ga gandjwe kiihakanwa yekwatonkonga.

Shaun Whittaker, omunawino miipambele yopamadhiladhilo, okwa lombwele oshifo shoNamibian Sun ohela kutya omakonakono gopaunamiti oga simana noga pumbwa okuningwa meendelelo pwaa na eongaongo.

“Olopota yopaunamiti oyo oshinenemina moshipotha kehe shekwatonkonga,” okwa fatulula. “Olopota yandje ongomunawino miikwamadhiladhilo otayi ya ponomola ontiyali. Ekonakono lyopaunamiti nali ningwe meendelelo – hasiku lyangula nande,” okwa kumagidha oshigwana.

Okwa gwedha po kutya nonande aanawino miipambele yopamadhiladhilo naahungimwenyo itashi dhengele ya popye niihakanwa esiku ndjoka lyoshiningwanima, omakonakono guundjolowele wopamadhiladhilo oga pumbwa okulandula ko mbala opo ga nyolithe olopota yokolela tayi vulu okulongithwa mompangu.

“Otwa pumbwa okukala noshihakanwa uule woowili hamano tatu ningi omakonakono opo tu wape okunyola olopota tayi vulu okutaambiwa ko paveta,” okwa fatulula.

Sho a kwatathaniwa naye opo a tye ko sha ohela, omukuluntuwiliki gwuundjolowele moshitopolwa shaKavango Uuningino Franciska Hamutenya okwa ti ina pewa uuyelele auhe wi ihwa po kombinga yoshiningwanima shika noina tseya ngele omuvali nokamwanakadhona oya tseyithile aapangi noondohotola meukililo oshiningwanima shika.

Kakele, okwa dhenge omuthindo kutya omalandulathano gomondjila oga pumbwa okulandulwa miiningwanima ya tya ngaaka.

“Ngele oya yakulwa shili kaanambelewa yetu, oya li ye na okutseyithila mbala oshikondo shegameno lyoomeme naanona mopolisi nenge ya gandje omuhungimwenyo mokulandula omilandu dhomondjila. Kaya li ye na okuya etha inaye ya pa uuyelele,” Hamutenya a ti.

Okwa ti kutya okwa kwatathana nomukuluntu gwoshipangelo nokwa tegelela olopota yi na uuyelele wi ihwa po mesiku lyonena tayi yelitha kutya oshike sha ningwa po.

Pokati mpoka, sho a kwatathaniwa naye ohela, minista gwuukashikekookantu Emma Kantema-Gaomas okwa tumine oshifo shoNamibian Sun komunambelewa mukuluntupithi muuministeli. Kakele, oonkambadhala dhokukwatathana nomunambelewa omukuluntupithi opo a tye ko sha koshikumungu shika, otwa hulile muunyengwi. Tango, aanambelewa mombelewa yopashitopolwa yuukashikekookantu oya tindi okutya ko sha koshiningwanima shika.

Omuvali gwokakadhona haka okwa hokolola nkene oshiningwanima sha holoka nehokololo tali zitha omahwilili.

Omuvali, ngoka edhina lye itali tumbulwa manga opo ku gamenwe oshihakanwa, omuselekadhi iha longo ngoka ta tekula oothigwa dhe heyali.

"Onda li ndi li puukamba wopopepi, tatu ikutha enota nookuume kandje, omanga aamwandje ye li kegumbo," okwa ti. "Inandi shi dhiladhila nande kutya ontowele yandje nomumati gwandje ota vulu okulonga iilonga yomilema ya tya ngaaka."

Shi ikolela kuye, omufekelwa okwa hulila mondondo ontiheyali noha litha iimuna ngashingeyi, nokwa li a heke okamwayinakadhona ke mu etele ontaku mepya.

"Okwe ka fa fala kokule naampoka a li ta litha oongombe, nokwe ka kwatele onkonga kehala hoka," okwa hokolola.

Nakulongelwa omuyonena, omulongwa gwomOndondo 3, okwa shuna megumbo ta lili, ihe yina ka li mo, opo e mu hekeleke.

"Sho nda galuka kongulohi, onda thikile tandi ka lala, inandi nongela uulunde wa longwa momutenya," okwa fatulula.

Ongula ongula onene okamwanakadhona oki ikumike noke mu lombwele shoka she ka adha. "Okwa lombwele ndje, 'Meme, onda kwatwa koonkondo komumwamememati.' Onda kunkwa," omuvali a hokolola.

Kakele kuunene woshiningwanima, omufekelwa otaku hokololwa a ka dhana etanga konima yokukwata koonkondo okamwayinakadhona, yina a ti.

Omuvali okwa ka pula omayele kaashiinda, mboka ye mu lombwele a lopote oshiningwanima shika kopolisi.

"Oya kunkilile ndje kutya ngele itandi ningi po sha, otashi vulika e shi ninge natango," okwa gwedha po.

Omufekelwa okwa mangwa po lwanima sho oshiningwanima sha lopotelwa opolisi nokwa holoka mOmpangu moKahenge, moka a tindilwa ombooloha. Oshipotha oshu undulilwa komasiku 4 Auguste opo ku ningwe omakonakono gomuule.