Liswaniso a nyana Uutoni kombinga yomahangano gokugongela oondjo

Omunambelewa omukuluntu gwelelo lyondoolopa yaKatima Mulilo, Raphael Liswaniso, okwa ti endilo lyaminista gwependulopo lyiilando nomikunda, Erastus Uutoni opo omalelo goondoolopa ga hulithe po okulongitha omahangano gokukonga oondjo olya nika ‘uuhasha’.

Uutoni oha yambidhidha omalelo goondoolopa okashona kowala, nomapopyo ge otaga tsu omukumo aakalimo ya tsikile nokwaa futa omayakulo gawo, Liswaniso a ti.

Minista ina longa sha gwana mokuyamukula kompumbwe yomalelo goondoolopa ge na oongunga odhindji, Liswaniso a gwedha po.

Okwa ti omapopyo gopapolitika ga nika uuhasha taga ningwa kaakwanepangelo otaga ningitha aakalimo ya dhiladhile kutya omayakulo gamuni ogoshali, shoka tashi nayipike okwaa futa.

Katima Mulilo okwa katukile onkatu aakalimo ye na oongunga mokulongitha ehangano Redforce Debt Management, pethimbo lyengungutulo lyokwaa uva ombili moondoolopa dhimwe molwa elongitho lyehangano ndjoka.

Uunkundi wuuministeli

Liswaniso okwa ti: “Owu shi kutya, otu uvite ko kutya ope na uudhigu wopapolitika nomvula ndjika oyomahogololo. Kakele, ondi itaala nondi uvite ko kutya minista e lile po ependulopo lyiilando nomikunda ota popi nuuhasha unene, shoka tashi vulu oku dhiapaga po omalelo goondoolopa”.

Okwa yelekanitha elongitho lyomahangano haga kongo oondjo sha faathana nankene epangelo lya toto po ehangano lyokugongela iiyemo yepangelo (NamRA), li longe po oshilonga shi inekelelwa uuministeli wiimaliwa.

Okwa gwedha ko kutya omahangano ga yama kepangelo ngaashi Telecom Namibia nango ohaga longitha omahangano gokukonga oondjo omolwa onkalo, ashike uuministeli owa hala omalelo goondoolopa – ngoka haga pewa oshimaliwa oshishona kepangelo – ge shi ninge go gene.

“Epangelo oli na uuministeli wiimaliwa mboka wa pewa oshinakugwanithwa shokugongela iiyemo yepangelo. Kakele, molwa uunkundi wuuministeli mokugongela iimaliwa mbika, oye eta mo NamRA, omukuthimbinga omutitatu ta gongele iiyemo peha lyepangelo.”

“Epangelo ohali yambidhidha omalelo goondoolopa nuumaliwa uushona. Oshiholelwa, Nontengenekothaneko ya konda oomiliona ethele, oto yambidhidha ondoolopa nomiliona yimwe oshinkwanu ntano yi gandje omayakulo.

Liswaniso okwa ti peha lyokupopya kombinga yelongitho lyomahangano haga gongele oondjo, minista na pule shila omapulo taga landulula: Okwoopalekitha ehala mondoolopa oku na ingapi? Evi oli na ondilo ngiini?

“Ondando yevi ohayi londo molwashoka oondoolopa kadhi na iimaliwa yokwoopalekitha omahala,” okwa ti.

“Epangelo ihali gandja iimaliwa mbika koondoolopa dhi opalekithe omahala. Osha tegelelwa opo ondoolopa yi longithe iimaliwa yawo yene yi opalekithe ehala ndika. Okuza miimaliwa yawo, oondoolopa odha pumbwa okugalulilwa oshimaliwa shawo.”

Omanga oondoolopa dha pumbwa okugalulilwa oshimaliwa shawo, aakalimo itaa gwanithwa po oshinakugwanithwa shawo, okwa gwedha po.

‘NamRA iha yolo’

Uutoni poompito odhindji okwa ti oondoolopa nadhi yande okulongitha omahangano haga gongele oondjo, ta gwedha po kutya naya uvathane naakalimo ye na oongunga.

Kakele, Liswaniso okwa pula kutya oshike tashi ningwa po ngele aayakulwa itaa iyutha komauvathano ngaka, sho ondoolopa dha lombwelwa dhaa mweneke( tete ko) omayakulo.

“ Minista ota popile okupopya naayakulwa. NamRA iha yolo.

“Elalakano lyetu okugandja omayakulo. Ngele otatu gongele nenge tu tsikile nokupopya noitatu mono aayakulwa taye ya poshitaafula shoonkundathana, natu ninge ngiini? Ngono ogo omapulo minista a pumbwa okuyamukula,” omukuluntupithi a pula.

“ Minista kehe ethimbo ota popi omayakulo goondoolopa ga nika iipa yombwa. Okwaa mona iiyemo kwoondoolopa ihaku thigi owala oondoolopa dhaa na iimaliwa, ihe ohashi tula oondoolopa moongunga. Omatungo getu oga kulupa, noitatu vulu oku ga opalekitha niimaliwa tayi zi [mokugongela kwetu yene].”

[email protected]