Gazza a nyana oongundu dhoompilameno sho inadhi gandja iikulya yoshikukuta

“Sho Swapo a li ta gandja iikulya yoshikukuta oomvula ne dha piti, oongundu dhoompilameno odha li peni?” omuhikingalo noshilyo shongundu tayi pangele Lazarus ‘Gazza’ Shiimi a pula pethimbo lyoshigongi shomahwahwameko mOkahandja mehuliloshiwike twa zi. Omuhikingalo a tseyika nawa, ngoka a pelwe oomiliona N$2.5 mo2014 miikonga yomahogololo gwoSwapo, okwa taukile moongundu dhompilameno moshingongi mwa li ngoloneya gwOshitopolwa shaKunene Marius Sheya omupopi omunene gwesiku.

Omuhikingalo gwongalo yi holike ‘Brandewyn’ okwa lundile oongundu dhoompilameno kutya ohadhi hituluka owala pethimbo lyomahogololo no ihadhi kutha ombinga miinyangadhalwa ngaashi okutunga oopate moshilongo, ta ti kutya Swapo okwa longo oshindji konima yokuhogolululwa mo2019.

“Ngele otaa ti oya pyakudhukwa notaa vulu okulela oshilongo shika ye vule Swapo, oya li peni oomvula adhihe ndhika ne sho Swapo a li ta gandja iikulya yoshikukuta, ta tungu oopate nokufula oomboola?” okwa pula.

Gazza okwa tsikile nokuyemba iigongi yoongundu dhoompilameno, ta ti kutya iimaliwa taa longitha miikonga yomahogololo ya dhenga mbanda niihauto oyindjiyindji ando oya longithwa nawa mokukwathelwa aakwashigwana.

“Yo [oongundu dhoompilameno] otaa ende yaa na oluthuwo okuza kooha nooha dhoshilongo, [taa ningi iikonga yomahogololo ]. Iimaliwa mbino ya longithwa okulanda iihauto nokuninga iikonga yomahogololo oya zi peni [ngele inaa vula okuwayimina Swapo mokukwathela aakwashigwana?]” okwa nyenyeta mOshiwambo.

Okwa li ta popi ongundu yoIndependent Patriots for Change (IPC), ndjoka ya ulikile oshigwana oohauto dhawo muFebuluali.

‘Ka pe na ehala lyiipolopolo’

Ta longitha iitumbula yOshiwambo, Gazza okwa ti “Ombiga yaa nasha otayi vulu okuudhwa kushaashoka, ngaashi ontungwa yi na etata lyuusila womahangu tayi vulu okuudhwa nevi kombanda”.

Okwa londodha Aanamibia yaa kale oontungwa dhaa nasha ndhoka tadhi vulu okuudhwa nuupu nomanwethemo omawinayi nenge niinima inayi halika. “Ngame okanona koSwapo. Oya kondjela emanguluko lyetu, onkene otandi sile moSwapo. Itandi pitika ontungwa yandje yu udhwe evi. Kape na ehala lyiipolopolo ,” okwa dhenge omuthindo.

Ta popi nayi natango oongundu dhoompilameno, Gazza okwa ti otaa “teya po oofamili”.

“otaye ya pokati koye, kaho nenge kanyoko, nokweeta iikolokosha taye mu ningitha mu ipume mumwe molwa uuwanawa wawo. Oya za kombanda yomafuta, yi ininga ongaakalimo, ashike oye na omalalakano ga holama. Otaa longitha Fishrot ongeipopilo; sha landula ko, ito ka mona we oohi tadhi zi mo mOmbaye. Kaleni mwa kotoka.”

Oshigwana sha yamukula

Omapopyo gomuhikingalo oga taambiwa ko sha yooloka koshigwana. “Aahikingalo ya tseyika nawa ngaashi Gazza otaa ndopeke oshigwana. Omanga aagundjuka taa nyanya mo molwa okwaaniilong, okwaathike pamwe pankalathano nuulingilingi, aahikingalo ohaa kala ya mwena. Ohaa taamba oomilliona okuza koongundu dha nika uulingilingi pethimbo lyiikonga ya kwate ko aayambidhidhi piigongi,” gumwe a nyola koX.

Yalwe oya ti omuhikingalo oti idhimbike owina eyooloko pokati kepangelo, ndyoka hali longitha iimaliwa yaagandji yiifendela moompumbwe a tumbula pombanda , naSwapo, ta gwedha po kutya ota gandja efano lya puka kutya iimaliwa oyaSwapo.

“Oshiyemateka kutya aantu taa li oshimaliwa shepangelo sha yakwa okupitila moFishrot oya nyanyukwa okuhepeka aakwashigwana' nokwiidhimbika okupopya iifundja mbika,” omulongithi gulwe goX a ti.

Ashike yalwe oya yambidhidha omuhikingalo , nagumwe ta ti: “Gazza oku li mondjila. Omunashili, lelalela. Epangelo lyo Swapo olya tunga ashihe tashi adhima moNamibia, oshili nayi popiwe”.

“Huka okuhwahwamekwa kwoshito, shila ongele wa li wa hala a yambidhidhe ongundu yoye shila,” gulwe a komenda.