Nafau takunkilile omahangano ga gwanithe po oondjambi oompe

Oondjambi oompe dhoodola N$18 mowili odha yi miilonga mesiku 1 Januali 2025. Amushanga-ndjai gwehangano lyaaniilonga lyoNamibian Food and Allied Workers Union (Nafau), Jacob Penda, ota ti aagandji yiilonga ayehe moNamibia naya fute oondjambi oompe ngaashi dha uthwa kepangelo. Oondjambi oompe dhaaniilonga otadhi holoka momukandanyanyangidho gwepangelo omuti-8409, gwa nyanyangidhilwe 7 Auguste 2024. Penda oti indile epangelo naakuthimbinga ayihe ya tule miilonga oondjambi ndjika oompe, ashike kwaamboka (oongeshefa) itaya ka vulika koveta otaya ka futithwa noolisensa dhawo otaye dhi kuthwa. Kakele, shi ikolela komukandanyanyangidho gwepangelo, aaniilonga yomofaalama otaya futwa oodola omulongo mowili sigo opetameko lyomumvo tagu ya sho taya ka mona omauwanawa gokugwedhelwa ya futwe oodola N$14 mowili, ishewe okuza mesiku 1 Januali 2027 aaniilonga yomofaalama ondjambi yawo otayi ka gwedhelwa okuya poodola N$18 mowili. Kombinga yaaniilonga yomomagumbo otaya futwa N$12 mowili nuumvo, omumvo tagu ya otaya ka futwa N$15 mowili, notaya ka futwa ihe N$18 mowili petameko lyo2027. Egwedhelo lyoondjambi inali kwatela mo omauwanawa galwe, omauwanawa ga gwedhwa po itaga ka za kondjambi ndjoka, shika oshi ikolela ketseyitho lyoondjambi dhopaife.Penda ota ti oveta ndjika otayi koleke uuthemba wopekota waaniilonga notayi lalakanene okuhwepopaleka omahupilo gawo nokukwashilipaleka wo iilonga oyi li pauyuuki. "Shika osha simana unenenene kehangano lyaaniilonga lyoNafau, ndyoka lya kalela po aaniilonga oyendji yendji miimpungulonga ngaashi: moshikondo shoohi, shoostola, shoohotela noshomapashiyono," okwa ti.Iilyo yomahangano gaaniilonga nAanamibia haya longo momumbwalangandjo otaya ka tyapula okuza moluhepo noshowo omayakulo guundjolowele nogelongo ga hwepopala okupitila moondjambi ndhika oompe, okwa fatulula. Shi ikolela komukuluntu gwehangano lyaaniilonga, otadhi ka kwatha wo mokunkondopeka eliko lyoshilongo nokukwathelwa okuninga oshigwana tashi lalakanene uuyuuki waayehe. Penda oti indile Uuministeli wIilonga opamwe naKomufala gwAaniilonga ya tule po okakomitiye ta ka nkondopeke etulo miilonga lyoondjambi ndhika oompe. Ehangano lyaaniilonga otali indile woo aakuthimbinga yalwe ngaashi ehangano lyoNamibia Revenue Agency (NamRA) nokakomisi koSocial Security Commission Fund (SCC), ya kwathe mokwaandjaganeka omauyelele kombinga yoondjambi dhaaniilonga ndhika oompe. Penda ota ti epangelo olya ya moonkundathana dhomuule noshigwana kombinga yoondjambi dhaaniilonga oompe naashika osha ningwa mumvogu, noina lopotelwa omakemo gasha. Onkene kape na etompelo kutya omolwashike omugandji gwiilonga Omunamibia itaa futu ondjambi ndjoka, ta ti. Okwa ti wo eiyendululo itali kala po ishewe ehangano lyaaniilonga inali tegamena aaniilonga oyendji taya ka kanitha iilonga molwa oveta ndjika. Nafau opamwe nomahangano galwe gaaniilonga ge li kohi yehangano lyaaniilonga lyoNational Union for Namibian Workers (NUNW) otaya indile iilyo yawo yi thike poombelewa dhawo moshilongo ashihe, ya lopote mboka itaya vulika koveta ndjika yegwedhelo lyoondjambi oompe, opo shi konakonwe kuuministeli wiilonga, Penda ta ti.

Nafau takunkilile omahangano ga gwanithe po oondjambi oompe

Comments

Namibian Sun 2025-03-10

Please login to leave a comment

Nafau takunkilile omahangano ga gwanithe po oondjambi oompe

Comments

Namibian Sun 2025-03-10

Please login to leave a comment

Login