Uutetela wuusekeleta, omakende goombiila ga momagumbo goMass Housing

Peha lyokweedhilila aantu momagumbo, omagumbo gomOtjomuise ga tungwa kohi yopolojeka yomupelesitende omukulu Hifikepunye Pohamba yasimana yetungo lyomagumbo ogendji oga ninga ehala lyomakende goombiila ga tatuka nuutetela wuusekeleta.

Ngashingeyi, aantu mboka yaa na evi mo Windhoek otaa ningi omatilitho ya lale omagumbo ngele inaga pewa ooyene mo29 Februali.

Etalelepo lyoNamibian Sun kehala ohela olya holola kutya omagumbo agehe oga li ga tulwa ondhalate ga pwa ko nondhalate yomakwega, kokwaa na naanegumbo ye ga pewa.

Oshiimbi shika ,kakele, inashi kala sha gwana okwiindika mo oohandimwe mboka ya fa haa longitha omagumbo ongo omahala gokuninwa nogiilonga yilwe iiwinayi – nomandhindhiliko giinyangadhalwa yawo yi iwetikile pehala.

Nokweenda mo mu limwe lyomomagumbo inaaga lala osha ulike kutya omanga ga kala konyala ge na iipumbiwa ya gwana po mwa kwatelwa uuskopa womokombitha, uundjugo nomiyeli, oopulaka dhimwe dhokutema nokudhima olusheno nuupomba kaa wu mo. Iinima oyindji otayi ka pumbiwa ku pingene po iinima ya kana ngele omagumbo ga pewa aakalimo.

‘Epangelo nali yamukule’

Ya tulwa miilonga pehulilo lyelelo lya Pohamba mo 2013, opolohalama yetungo lyomagumbo ogendji oya uvanekele okutunga omagumbo 185 000 manga 2030 inaaga thika.

Edhiladhilo ndyoka, ndyoka lya dhiladhilile okuyamukula koompumbwe onene nomukundu gomalukulwa moNamibia, moomvula dha piti olya taalele omashongo nomikundu odhindji.

Oomvula hamano okuya kesiku lyahugunina, kumwe oomiliona dhontumba odha hepa ngashingeyi, Windhoek – ngoka a taalelwnoonkondo kokukala nomagumbo omashona noonkondo – okwa mono omagumbo ga li ga nuninwa ooyene yago ga kala inaga lala, kakele komauwanawa gopolohalama.

Onkalo yomagumbo inaaga lala, ngoka ga li ga tungwa ku CalgroKuumba, okuza mokwaaauvathana kwonale kwopaveta pokati kehangano ndjoka nepangelo.

Ta popi noNamibian Sun, omunashipambuliko moCalgroKuumba Titus Nakuumba okwa ti omapulo kombinga yomagumbo inaga lala naga ukithwe kepangelo, oshoka ehangano lye olya tsakanitha ombinga yalyo yeuvathano.

“Omapulo ngoka kutya omolwashike omagumbo inaga lala, epangelo nali yamukule. Inaa manitha okufuta iifuta yiilonga ya longwa,” Osho a ti.

Shi ikolela kuye, ongeshefa ye oya pondola okusindana oshipotha shawo, nompangu yopombanda ya tokola muuwanawa wawo ompinge nepangelo.

Okwaa lala komagumbo okwa za keindilo lyokufuta iilonga ya longwa yongushu yomilliona N$40, Osho a ti.

Nakuumba okwa gwedhwa po okwa thanekele okulanda po omagumbo okuza kepangelo opo ku adhwe ehulilo lyoshikumungu shika.

Omulandu gwopaveta

Ominista yependulopo lyiilandp nomikunda Erastus Uutoni okwa ti ope na omilanda dhopaveta dha kwata egandjo lyomagumbo kepangelo.

“Ope na omaupyakadhi gamwe omashona gopaveta ngoka ga pumbwa okulongwa mo tango,” Osho a ti.

Omunambelewa omukuluntu Nghidinua Daniel okwi ikala okulonga nayi kombinga yepangelo, oonkambadhala odha ningwa ku monike ekandulopo lyomukundu otayi longo monakiziwa.

“Uumwene womagumbo nehala owu li miikaha yomunakontalala, CalgroKuumba. Omagumbo inaga pwa natango no inaga gwana okulala,” Osho a ti.

“Eyonuko kehe li li oshinakugwanithwa shomunakontalaka. Otwa tsakanena noku kutha ko oshikumungu nomunakontalaka. Onkalo itayi idhidhimikilwa noye eta okundaneka okuwinayi kombinga yepangelo,” Osho a ti.

Omatilitho gokulala

Omunandjungu Michael Amushelelo okwa ti okwa kala noku adhika kaantu oyendji taye ya kuye taa pula omolwashike ye na okutsikila okufuta iifuta yokuthitha yi li pombanda sho epangelo li na omagumbo inaga lala.

“Aantu oya kala noku tumina ndje omafano gomagumbo inaaga lala. Otatu pe omalelo agehe ge na no ombinga sigo mo 29 Februali ya kwashilipaleke kutya omagumbo ngaka gaa na aantu oge na ooyene. Okundopa [okwiiyutha otaku eta oshizemo] shaantu yi [iyunganeke] yoyene noku ka lala omagumbo ngoka,” Osho a ti.

“Otatu ningi shika oshoka epangelo ohali pulakene owala uuna lya thiminikwa kaakwashigwana.

“Otatu ka lala omagumbo nongele twa lala omagumbo, epangelo otali ka thiminikwa li gandje omatseyitho gokutidhwa pehala ge tu kuthe mo momagumbo,” Okwa gwedhwa ko.

“Ooyene yomahala oya ninga yaa na ko nasha molwa onkalo yomalukalwa,” Okwa hokolola.