Okaklinika kongushu yoomiliona N$6 ka tungilwa aakalimo yomomalukanda gaTjiwarongo

Nelalakano okukandula po omaupyakadhi gaakalimo yomomalukanda gomOtjiwarongo, uuministeli wuundjolowele owa patulula pambelewa Okaklinika kaMbili mOtjiwarongo oshiwike shika, hoka ka tungwa payambidhidho lyopashimaliwa lyomina yoshingoli yoB2Gold. Okaklinika okongushu yoomiliona N$6.

Okaklinika otaka eta omayakulo gopaunamiti popepi naakalimo yomolukanda lwaMbili ya konda 19 000 noshowo yalwe yomomalukanda gopopepi ngaashi DRC, Telecom naXara-aibes, mboka ngashingeyi haya ende iinano iile ya ye kOkalinika kaOrwetoveni nenge ya ye kOshipangelo shEpangelo shaTjiwarongo uuna ya pumbwa omayakulo gopaunamiti.

Minista yuundjolowele Dr Kalumbi Shangula okwa ti aakalimo ohaya yi kOsenda yUundjolowele yaMbili, ndjoka yaa na omayakulo agehe gopaunamiti agehe gi ihwa po.

Omina yoshingoli yoB2Gold oya gandjele omagano goshimaliwa shoomiliona N$6 konima yoomwedhi hamano, opo ku tungwe okaklinika, nelalakano okuhwepopaleka nokugwedhela uuklinika niipangelo yepangelo.

"Kakele kuuklinika niipangelo mbyoka yi li po nale, omwaka omunene gwomayakulo ogwa kala po momalukanda ngaashi Ombili, DRC, Telecom, naXara-aibes," minista a ti.

Pakutala ngele oshigwana ashihe oshi na omayakulo guundjolowele, okaklinika okape ota ka dhana onkandangala onene mokuungunga nokwaathike pamwe komayakulo gopaunamiti hoka kwa taalela aakwashigwana yokiitopolwa yokuushayi hoka aakwashigwana mboka ihaya yakulwa oyendji moshitopolwa.

Oshikwawo, otaka lalakanene okugandja omayakulo gi ihwa po ngoka ga simana mokushonopeka etaandelo lyomikithi moshitopolwa

Omayakulo

Okaklinika otaka ka gandja omayakulo getuntilo, omathulo nesiloshimpwiyu lyaamwali, nokuningilwa omapulapulo nokupangwa omikithi inadhi nika oshiponga.

Otaka ka gandja wo omayakulo gokuungaunga nomikithi ngaashi ombuto yoHIV/AIDS nomukithi gwoTB, osho wo okuungaunga nomikithi dhomikwau naandhoka dhaa shi dhomikwau, omayakulo ge nasha nepango lyomayego noku ka tala omiti koapteka, omayakulo goluvalo lwa longekidhwa neyakulo nawa lyaanona ye li mepipi lyokamukondapweyu.

"Namibia okwa kala ethimbo nuule i itula mo mokukala noshigwana ashihe shi na omayakulo guundjolowele, nosho oshilalakanenwa shi li pamilandu dhuundjolowele dhopashigwana nodhopaigwana. Oshitsa shopokati shoshilalakanenwa shika osho euvoko kutya uundjolowele owo uuthemba womuntu wopekota nowo ongudhi ya simana yehumokomeho tali tsikile," Shangula a ti.

Okaklinika oke na wo yilwe ya gwedhwa po tayi kwatha ka yakule nawa oshigwana, ngaashi ooparkinga, uundjugo waaniilonga wowaavu, iipundi niitaafula. Iigwedhela mbika otayi ulike eitulomo lyaaniilonga yuundjolowele koshigwana tashi yakulwa, minista a ti.

Minista okwa ti Okaklinika otaka ulike oonkondo dhelongelo kumwe lyepangelo nomahangano gopaumwene ngoka taga hwepopaleke oshikondo shuundjolowele moNamibia.

“Okaklinika oko endhindhiliko lyaashoka tashi vulu okuningwa po uuna epangelo noshikondo shopaumwene tayi longele kumwe moshilalakanenwa shimwe," okwa ti.

Okwi indile aaniilonga yuundjolowele ya sile oshimpwiyu okaklinika nokuyakula oshigwana nawa.

“One ehukamugongo lyoshikondo shetu shuundjolowele. Oshigwana osha tala kune mu kaleke po omifango omiwanawa dhesiloshimpwiyu, nondi na omukumo mokuvula kweni okuyakula nawa oshigwana,” okwa ti.

Okwa ti koshigwana: “Okaklinika haka okeni. Ka taambeni, naka gamenwe nokukwathwa ka kale po.”