Tseyithileni Omuprima kombinga yiikulya yoshikukuta - Mbumba

Presidente Nangolo Mbumba okwi indile oshigwana shoka tashi hupu shokadhila noinashi pewa iikulya yoshikukuta kookamunsela, shi lopote kombelewa yOmuprima opo oonkatu dha pumbiwa dhi katukwe mbala.

Mbumba okwa ningi eindilo ndika mEtitatu peegululo pambelewa lyomaulikilo giipindi gEhao Cultural Expo lwoshikando oshititatu mOkahao ngoka ga tameke mo 21 Juli kohi yoshipalanyolo: “Mpoka omuthigululwakalo noompito dha tsakanena”.

Okwa ti omaulikilo giipindi oga adha Namibia moshikukuta tashi hweenene sha guma uunamapya nuuniimuna nomahupilo gaafaalama moshilongo.

Mbumba okwa ti epangelo otali kambadhala ngaashi tali vulu okuhupitha Aanamibia nomahupilo gawo okupitila mopolohalama yiikulya yoshikukuta nokugandja iikulya yopaulumompumbwe.

“Ondi inekela eyambidhidho ndika olya thika kooyene ye li nuninwa. Ngele hasho, alikana lopoteni koombelewa dhoongoloneya yiitopolwa yeni oshowo kombelewa yOmuprima (Saara Kuugongelwa-Amadhila) opo aantu mboka ye li mompumbwe shili ya vule okukwathwa pethimbo,” okwa ti.



Uuthiga

Mbumba okwa ti okupitila miinyangadhalwa ngaashi omaulikilo giipindi gEhao expo, otaa vulu okutumbula nuuntsa nuunambano kutya Okahao “Egumbo lyUuthiga Owundji."

“Uuthiga wetu uuyamba wa pumbwa okugamenwa nokukalekwapo molwa omapipi nomapipi tage ya. Osha simana opo aagundjuka yetu yu uve ko nokutaambako mpoka twa za, oshoka aantu itaa vulu okusimaneka nokusila oshimpwiyu shoka inaa tseya. Oshikwawo okukalekapo omuthigululwakalo nekoko paliko nayi endele pamwe ku kwashilipalekwe eyokomeho nokweetapo omadhiladhilo omape. Ayihe mbika oya simana shi thike pamwe,” okwa ti mokugwedha po kutya muuyuni, omu na euvoko tali koko kutya omuthigululwakalo nuuthiga otau dhana onkandangala onene mokutunga oshilongo.

Mbumba okwa ti omuthigululwakalo ogwi iholola kutya otagu longo nawa mokuhwepopaleka uukalinawa nuundjolowele waakuthimbinga miikwamuthigululwakalo noshowo aalandi.

Omupresidente okwi indile Aanamibia ya ye komaulikilo giipindi nokuyambidhidhathana nokulongitha ompito ndjika okwiilonga oohedhi dhi ili nodhi ili nokutyapula oondya dhopamuthigululwakalo.

Okwa longitha wo ompito i indile mboka ya adha okuhogolola yi ishangithe uukalata womahogololo momasiku ga hupa ko noku ka hogolola oongundu dhawo dhopapolitika nookandidate dhopaupresitende ndhoka ya hala muNovemba.

Omukwaniilwa gwaNgandjera Johannes Mupiya okwa ti kutya epangelo oli na iinakugwanithwa oyindji nohaku eta po owala oompito dhiilonga, onkene opwa longekidhwa omaulikilo gEhao ga kwashilipaleke aantu otaa eta po iilonga yawo yene.

Mupiya okwa ti epangelo ohali longitha oonzo dhi li po li kwashilipaleke kutya kehe Omunamibia okwa mona uuwanawa nelalakano alike okukwashilipaleka ehumokomeho lyoshilongo nokukwashilipaleka Aanamibia ayehe oye na onkalamwenyo ombwanawa.