Omukundu gwesiloshimpwiyu lyaanona lya nkundipala tagu koko

Konyala iipotha 69 yesiloshimpwiyu lyaanona lya nkundipala oya lopotelwa Opolisi yaNamibia okuza Januali mumvogu sigo Maalitsa nuumvo.

Kuyele oshiwike shika, Namibian Sun okwa kundaneke oshiningwanima shuunona uyali auhe womimvo ntano mOshitopolwa shaShikoto wa fike po oshigandhi shaandjawo konima yokuthigwa megumbo awuke pwaa na ngoka te wu tonatele.

Nonande inamu kanena oomwenyo, shika osha ninga oshindji momidhingoloko odhindji moka esiloshimpwiyu lyaanona lya nkundipala hali holoka, ashike ihapu ningwa sha onkalo ndjika yi hule.

MuJanuali nuumvo, Namibian Sun okwa kundaneke nkene uunona uyali, awuhe woomvula ntano, wa si omeya momukunda Okagongo kaAkwambashu moshikandjohogololo Ogongo moshitopolwa shaMusati.

Iilanduli yi yemateka

Otaku hokololwa kutya uunona utatu owa lombwelwa wu takamithe iikombo kuumati uyali woomvula 14 no15, mboka wa yi wu ka longe mepya.

Oomwedhi ne dha zi ko, okwa lopotwa kutya okanona kokamati komvula yimwe oka sile meyemele lyomeya momukunda Onziku moshikandjohogololo Oshikuku moshitopolwa shaMusati.

Otaku hokololwa kutya okanona oka sile meyemele lyomeya ndyoka lya thigwa pelugo. Oka ka monika kuunona uukwawo, mboka wa tseyithile aakuluntu yawo, nopolisi oya tseyithilwa lwanima.

Mumvogu, Namibian Sun okwa kundaneke nkene Magano Kambonde (43) gwomomukunda Uuhongo momudhingoloko gwaNesi a mangwa po nokuholoka mOmpangu yaMagistrata gwaOutapi konima sho okanona ke koomwedhi omulongo nayimwe ka sile meyelemele lyoolitela 25 lyiilya ya yayekwa, molwa esiloshimpwiyu ndyoka taku hokololwa lya nkundipala.

Pethimbo ndyoka, epeko lyopolisi kombinga yoshiningwanima shika olya hokolola kutya Kambonde okwa thigi uunona we utatu uushona megumbo owo awuke waa na ngoka te wu tonatele momasiku 10 Novemba 2021, shoka she eta eso lyokanona hoka okashona. Uunona mbwiyaka uyali owoomvula heyali noomvula omugoyi.

Mbyoka iiholelwa owala ya yimwe yomiiningwanima ya lopotwa yesiloshimpwiyu lyaanona lya nkundipala mbyoka ye eta omaso.

Onkalo

Sho a pulwa kombinga yesiloshimpwiyu lyaanona lya nkundipala netamaneko lyaavali nenge lyaatekuli taa tamanekelwa ehepeko lyaanona, omugandji-mulombo gwopolisi Omupevi Komufala Kauna Shikwambi okwa fatulula kutya nonande opolisi ohayi tamaneke aafekelwa, opo oshikumungu shika shi ungaungiwe nasho nawa, ekuthombinga lyaayehe olya pumbiwa.

“Onkalo otayi enditha omwenyo noonkondo, unenenene ngele tashi ya puunona inau silwa oshimpwiyu notau hepa,” Shikwambi a lombwele Namibian Sun.

“Omathimbo gamwe, oshidhigu okudhimbulula ngele okanona inaka silwa oshimpwiyu nenge oke li moshiponga shomahepeko ongele shila ehepeko lyokolutu, ngele iilalo niiposho yi wetike," okwa fatulula.

“Uunona owundji inau gwanithilwa po oompumbwe dhawo dhopekota ngaashi ohole, iipalutha, etonatelo ewanawa, epango lyopaunamiti, iikutu, elongo, negameno," okwa gwedha po.

“Ope na iipotha oyindji ihayi lopotwa, onkene etokolo lyetu okukundathana nokulonga oshigwana kombinga yomahepeko gaanona nankene wu na okuga lopota. Omahepeko gaanona nesiloshimpwiyu lyaanona lya nkundipala naku lopotwe; ano, na ku hule."

Okwa fatulula kutya oshinakugwanithwa shopolisi miipotha yimwe mbika otaku vulu owala okugwedhelwa ngele oshigwana tashi kutha ombinga, pakulopota iiningwanima opo omakonakono ga ningwe naafekelwa ya tamanekwe nawa.

“Otashi pula ekuthombinga lyaayehe opo tu gamene aanona yetu komauwinayi agehe nokoshiponga kehe”

Oombelewa odhindji

Sho a pulwa a tye ko sha koshikundathanwa, omunawino miipambele yuukashikekookantu negameno lyaanona Veronica Theron okwa ti esiloshimpwiyu lyaanona lya nkundipala ihali ungaungiwa nalyo neulomo ndyoka lya pumbiwa.

“Oveta yEsiloshimpwiyu nEgameno lyAanona ontitatu yomo2012 otayi fatulula okwaa sila oshimpwiyu mekwatathano nokanona ongendopo lyomuntu ta sile oshimpwiyu okanona oku ka gwanithila po oompumbwe dhopekota dhopalutu, dhopamadhiladhilo, nenge dhopankalathano,” okwa fatulula.

“Pamadhiladhilo gandje, aagandji yomayakulo gopetameko ngaashi aahungimwenyo, aapolisi noondohotola ihaa ungaunga nesiloshimpwiyu lyaanona lya nkundipala neulomo ndyoka lya pumbiwa.

“Haayehe ya dheulwa nenge ya pyokoka momilandu dhopaveta dha pamba egameno lyaanona, uunenene mboka ya zi kiiputudhilo yopombanda nenge momadheulo gaapolisi," Theron okwa gwedha po.

Okwa dhenge omuthindo wo kutya iipotha koompangu ya pamba uunona oya pumbwa aaniilonga aanandjungu nokwa ti iilonga yaapopili mbaka yaanona inayi tseyika, "Omakwatho kiihakanwa yomahepeko inaga yela nawa oshoka oombelewa odhindji.”