Kuku Agri ta lili Nujoma: ‘Okwa li ha tsu ndje omukumo’

Omunangeshefa omvalele yaIndia nomukalimo gwomOshakati Vinod Kumar, a tseyika nawa 'Kuku Agri,' okwa holola onkumwe ye noluhodhi lwe molweso lyomupresidente gwotango gwaNamibia omukokoli Sam Nujoma, e shi holola pethimbo lyoonkundathana dhe noshifo shoNamibian Sun mOmaandaha.

“Onde mu tala ko aluhe ongatate. Okwa kala aluhe nokuyambidhidha ndje. Okwa li ha tsu ndje omukumo noye omukumiki gwandje," Kumar a ti mOmaandaha a kengeleka.

Kumar okwa ti okutsakanena kwe naNujoma moshilongo shaandjawo mo2004 osho she eta opo a tokole a tembukile moNamibia, nokwa toto ongeshefa ye yedhina Kuku Agri Equipment.

Moonkundathana dhetu naye puyimwe yomoongeshefa dhe mOshakati mOmaandaha, Kumar, newi etalala ashike olya nika oluhodhi, okwa holola eyeme lye omolwa eso lyaNujoma.

Omukokoli presidente okwa mana oondjenda dhe moshipangelo shopaumwene mOvenduka mOlyomakaya ga zi ko.

Kumar okwa ti nonande okwa kumwa mokukundana onkundana yeso lye mOsoondaha, "meni muule womutima gwandje, ondi shi shi okwe ehama ethimbo ele. Okwa kondjo nuupenda. Konyala hanga uule womvula yimwe okwa kala te ehama. Onde mu yuulukwa noonkondo."

Kumar okwa dhimbulukwa nkene a tsakanene tango naNujoma mo2004 sho omukokoli presidente, opamwe nosheendo shAanamibia mboka ya talele po India nelalakano lyokuhalitha aalongithipunguli aakwiilongo ya ngeshefe moNamibia.

Konima yoomvula mbali sho Nujoma nosheendo she ya talele po ofaambulika yokunduluka iilongitho yuunamapya nuuniimuna, Kumar okwa tokola a tembukile muNamibia nomalalakano gokungeshefa.

Okwa dhimbulukwa kutya sho ya tsakanene naNujoma moIndia, oya popi kombinga yiipindi naNujoma okwa ti Kumar okwa manguluka opo e ye koNamibia.

“Osha pula ndje oomvula mbali opo ndi tokole ngele nandi ye tuu huno, nosho she ende ngaaka opo ndi tembuke nokutota po ongeshefa yandje Kuku Agri. Otwa kala nokutsakanena olundji, unene shampa e ya kOwambo."

Ohole yuunamapya nuuniimuna mwaayehe yaali

Kumar okwa ti Nujoma okwa li e hole noonkondo uunamapya nuuniimuna.

"Okwa li a hala okutseya oshindji kombinga yawo nokutala nkene ta vulu okuyambula po oshikondo shuunamapya nuuniimuna moNamibia. Okwa li hatu yi naye pamwe koofaalama noofaalama opo tu monathane naafaalama yalwe [ngame ndi ya tse omukumo ya taambe ko] uunafaalama woshinanena."

Oshikwawo, Kumar okwa talele po Nujoma pofaalama ye yedhina Etunda popepi nondoolopa yaTavi, "hoka olundji ya popi kombinga yuunamapya nuuniimuna noshowo kombinga yelongo. Iikondolonga mbyoka iyali otwa kala nokukwandjangela kombinga yawo aluhe.”

Kumar okwa ti oshikando shahugunina a talela po Nujoma mofaalama ye mOtavi, ombalambala konima sho omukithi gwekomba gwoCovid-19 gwa hulu, noya li ya lile omwiha pamwe.

Nujoma okwa li a panda shili sho oskola nokaklinika taka tungwa mofaalama mEtunda.

Kumar okwi indile Aanamibia ya tsikile ko kuuthiga waNujoma. Okwa dhenge omuthindo komalunduluko ngoka taga vulu okutulwa miilonga moshikondo shuunamapya nuuniimuna.

“Etumwalaka tandi lombwele Aanamibia olyo ndika kutya naya kwatele po uuthiga we,” okwa ti.

[email protected]