Olopota: Fishrot e etitha ondjala, oongunga nomalimbililo

"Aantu oya sa ondjala nayi – ondjala yoyene yene." Shika osho Frederico Links, omupekapeki mehangano lyoInstitute for Public Policy Research (IPPR) a ti kombinga yomahupilo gaayuli yoohi mboka ya kanitha iilonga yawo molwa oshikumungu shuulingilingi woFishrot. Aayuli yoohi otaya pula ya futwe kehe gumwe oodola US$80 000 (hanga N$1 444 153) okuza kehangano Samherji lyokoIceland ndyoka li na mo olunyala moshikumungu shoFishrot. MEtiyali, ehangano lyoIPPR olya pititha olopota ontiyali kombinga ya nkene oFishrot ya guma uuthemba waantu moNamibia. “Otwa hala okuulikila Namibia nuuyuni auhe koonono iizemo yuulingilingi – naashoka uulingilingi we tu etela," Links a ti. Olopota otayi gandja uuyelele kiilanduli yuulingilingi mbuka – okuza konkalo yopamadhiladhilo yaayuli yoohi nankene oofamili dhawo dha gumwa kokukanitha iilonga huka sigo okonkalo yoyeneyene yaayuli yoohi. "Iimbuluma ya longekidhwa ohayi talika ko yaa na iihakanwa yasha," Links a ti, okwa gwedha po kutya okwaa na iilonga okwa guma nayi uukalinawa wopamadhiladhilo waayuli yoohi. "Omuntu owa pumbwa okuuva ko kutya shika otashi ti ngiini kOmuluudhe omulumentu ngoka i itaala muulumentu," okwa gwedha po. "Haalumentu mbaka ashike – ihe oyana, aakwanezimo nomomidhingoloko dhawo odha gumwa koshikumungu shika." Oonkalamwenyo noondjodhi odha yonwa. Omutoolinkundana Omunamibia Ester Mbathera, gumwe gwomaapekapeki, ota dhimbulukwa okutsakanena naayuli yoohi komikunda dhawo konooli. Okwa hokolola onkalo yomuyuli gwoohi gumwe, Petrus Shikongo. “Omulumentu nguka okwa li e na omadhiladhilo,” ta popi kombinga yaShikongo, ngoka a li ta tungu oostola pooha negumbo lye kOmuntele. Okwa li a dhiladhila okutunga omaalaka, opoosa nosalona, ihe omathaneko ngaka opuwo manga. Mongashingeyi, Shikongo oha munu iingulu noondjuhwa oonshona, nonande nale sho a li ha longo, okwa li ha landitha oondjuhwa odhindji lela pomudhingoloko, Mbathera a ti. Oshikunino shaShikongo otashi ende tashi si po kashona nakashona, oshoka omeya ge oga tetwa ko. Oku na oohauto mbali ndhoka tadhi vulu okufelefula( uutaksi), ashike adhihe odha teka noke na oshimaliwa sho ku dhi pangelitha. Iilanduli iiwanayi yi li molopota yoIPPR oya kwatela mo omayalulo ga za momapekapeko ga ningwa kaapekapeki. Mokati kayilwe, oopelesenda 53% dhaayuli yoohi naakwanezimo yawo kaye na iipalutha ya gwana yesiku kehe, omanga oopelesenda 42% dhaayuli yoohi otaya ti oshidhigu okunyangela egumbo esiku kehe. Oyendji, 92%, oya li haya kwathele oofamili dhawo painiwe, noyu uvite kutya inaya simanekwa we moshigwana omolwa onkalo yawo. Oopelesenda 94% dhaayuli yoohi odha yambula po omidholongoko dhawo. Momapekapeko, oopelesenda 82% dhaayuli yoohi oya ti oya kanitha ookuume kawo konima yokukanitha iilonga. Oyendji yomaakuthimbunga momapekapeko inaya mana oskola, oopelesenda owala 7.5% dha hulila momatilika (ondondo 12) omanga oopelesenda 48% dha hulila mondondo 10, noopelesenda 28% omondondo onti-8. Konyala oopelesenda 90% otaya nyengwa okukutwa miilonga tayi kalele moshikondo shoohi nenge miikondo yilwe, noopelesenda 98% taya holola kutya oyo aavali – noopelesenda 52% oya ti oya vala uunona une nenge wa konda po. "Okukala yepipi lyopokati naasho yaa na uulongelwe itaku ya kwatha mokukonga iilonga... aantu oya hala iilonga; inaya hala okupewa mokana,” Links a ti. Oopelesenda 91% dhaayuli yoohi oya holola kutya ohaya pewa N$4 000 kehe komwedhi okuza kepangelo. Nonande ya pandula oshimaliwa shika, otaya ti inashi gwanena oompumbwe dhawo dhakwalukehe. Aayuli yoohi oyendji, konyala oopelesenda 40%, otaya ti oye li moondjo noye na okulanditha po omaliko gawo opo ya hupe. Aayuli yoohi ya konda poopelesenda 95% oya li ye hole iilonga yawo notaya ka galuka ngele oya pewa ompito.