• Home
  • EDUCATION
  • Omulongi a tidhwa miilonga ‘okwa li niipotha yilwe 14’
0-1
0-1

Omulongi a tidhwa miilonga ‘okwa li niipotha yilwe 14’

‘Hasho oshikando shotango ta pogola’, uuministeli wa ti
Uuministeli welongi owa holola kutya epeko lyaPetrus Ndeulita olyu ulika onakuziwa yiipotha oyindji ya konda pomulongo yokudhenga aalongwa.
Tuyeimo Haidula
Omulongi a tidhwa miilonga Petrus Ndeulita hasho oshikando she shotango ta pogola, niipotha 14 yokudhenga aalongwa kedhina lye, shoka oshi ikolela kwamushanga omukuluntu muuministeli welongo Sanet Steenkamp. Okwa li ta yamukula keindilo lyongundu yaalongi yamwe mboka ya ti oya pa uuministeli sigo opehulilo lyAuguste wu shune Ndeulita miilonga, nongele hasho otaa ka piyaganeka omahogololo muNovemba.

Ndeulita okwa tidhwa miilonga omwedhi gwa zi ko poprimaskola yaHashiyana mOngwediva omolwa oshiningwanima shomo2021 sho taku hokololwa a tokola opo omulongwa gwomondondo ontiheyali a yeluthe oshipundi uule wowili.

Aalongwa naalongi poHashiyana, oshowo aalongi yokooskola dhilwe, oya ningi omahololomadhiladhilo taa ti etidho lyaNdeulita “etidho miilonga lyaa li pauyuki”.

Mokuyelitha nawa oompango dhi na sha nokudhenga aalongwa nomifango dhokugeela nokupukulula dha landulwa moshikumungu shika, Steenkamp okwa ti Ndeulita okwa tameke iilonga yuulongi mu1 Januali 2018 nokwa gana e li ompinge nokudhenga aalongwa mu2 Apilili 2019, mekwatathano nOveta yElongo.

Omunashilonga kehe ta ka lundililwa okudhenga aalongwa ota ka taalele omatamaneko gokupogola, shampa owala pu na uumbangi wa gwana konima yekonakono lyomuule, okwa ti.

Hasho oshikando shotango

Kombinga yaNdeulita, okakomitiye kegeelopukululo oka gandja omathaneko shi ikolela kuuyelele ka mono, mboka wa tumwa kOkakomisi kAaniilonga yEpangelo eziminino li ze kOmuprima, Steenkamp a fatulula. “Oprosesa ndjika oyi ikolela kokuyoolola oonkondo mokuninga omatokolo. Ndeulita okwa tula mo eindilo lyetalululo kOmuprima okupitila mokakomisi, kakele, inashi mu endela nawa. Sha landula ko uuministeli owa gandja oshizemo shetokolo lyOmuprima ku Ndeulita 25 Kotomba 2021,” okwa ti.

Steenkamp okwa holola kutya oshipotha kehe ohashi konakonwa shi ikolela kuukwatya washo niiyetithi ohayi talwa opo ku kuthwe onkatu yegeelopukululo tayi opalele.

“Epeko lyaNdeulita olya holola onakuziwa yiipotha 14 ya lopotwa ya faathana, tashi holola eihumbato ongomukalondjigilile.

Shika hasho oshikando shotango [ye] a longo iilonga mbika yi indikwa,” okwa ti. Oshipotha osha ungaungiwa nasho nuukeka nopamilandu, okwa gwedha po.

Kakele, ngele Ndeulita ota ka kala u uvite ina tidhwa pauyuuki, na manguluke a konge epopilo okupitila kompangu, okwa ti.

Ta popi naNamibian Sun ohela momapulapulo pangodhi, Steenkamp ina vula okundjandjukununa iipotha ayihe 14 nokwa ti oshikumungu osha ungaungiwa nasho koskola. Okwa gwedha po kutya uuyelele wa gwedhwa po kombinga yepeko lyomulongi a kuthwa miilonga itau vulu okugandja kiikundaneki.

[email protected]

Comments

Namibian Sun 2024-11-22

No comments have been left on this article

Please login to leave a comment

Katima Mulilo: 23° | 38° Rundu: 24° | 35° Eenhana: 23° | 35° Oshakati: 25° | 34° Ruacana: 24° | 35° Tsumeb: 22° | 33° Otjiwarongo: 20° | 32° Omaruru: 22° | 36° Windhoek: 21° | 33° Gobabis: 23° | 34° Henties Bay: 15° | 19° Swakopmund: 15° | 16° Walvis Bay: 14° | 23° Rehoboth: 21° | 34° Mariental: 21° | 36° Keetmanshoop: 18° | 36° Aranos: 22° | 36° Lüderitz: 15° | 26° Ariamsvlei: 18° | 36° Oranjemund: 14° | 22° Luanda: 24° | 25° Gaborone: 22° | 36° Lubumbashi: 17° | 34° Mbabane: 18° | 32° Maseru: 15° | 32° Antananarivo: 17° | 29° Lilongwe: 22° | 35° Maputo: 22° | 36° Windhoek: 21° | 33° Cape Town: 16° | 23° Durban: 20° | 26° Johannesburg: 18° | 33° Dar es Salaam: 26° | 32° Lusaka: 22° | 36° Harare: 20° | 31° #REF! #REF!