Omukiintu te ehamanene konima yokuyahwa nuutati

Omukiintu omunamimvo 44 omukalimo gwomukunda Eexwa moshikandjohogololo shEenhana mOshitopolwa shaHangwena ota kondjo nomwenyo konima sho a ponokelwa komulumentu, nokweehamekwa noonkondo nuutati ongulohi yEtitano.

Omukiintu nguka ota mono epango moshipangelo shEpangelo shaShakati, moka taku hokololwa e li monkalo ombwinayi.

Omukwatakanithi gwomakonakono giimbuluma mOhangwena, Omupevi Komufala Melanie Mbuuru, okwa ti omufekelwa okuumbu ondayi, ndjoka ya kwata naakweehamekwa mepunda, noya tekele mo.

Nakweehamekwa okwa falwa koshipangelo shepangelo shEenhana e li monkalo ombwinayi nolwanima okwa lundululilwa kOshipangelo shEpangelo shaShakati.

Mbuuru okwa ti shoka she etitha oshiponga shika inashi tseyika manga, ashike opolisi oyi ipyakidhila nomakonakono. Omufekelwa omunamimvo 32 okwa tegelelwa a holoke mOmpangu yaMangestrata mEenhana noshipotha shonkambadhala yedhipago.