Fitty a tegelela oshizemo sheindilo lyombooloha ye

"[Tamson Hatuikulipi] okwa hala okulongitha nayi ompito, ndjoka i ikongele ye mwene. Yo [aatamanekwa yoFishrot] inaya ilongekidhila okupangulwa, ashike oya hala okumangululwa. Oya hala ompangu yi ye etele ohenda."



Omweeti gwiihokolola yepangelo Ezekiel Ipinge okwa popi ndhoka MEtitano pethimbo lyepulakeno lyeindilo lyombooloha yomutamanekwa moshipotha shoFishrot, Tamson Hatuikulipi.



Wumwe womuuyelele uupe hoka kwa kankamekelwa eindilo lyombooloha yaHatuikulipi, okukala kwe mondholongo oomvula ntano ihe natango kape na esiku lya tothwa ongesiku lyokupangulwa kwaatamanekwa moshipotha shoFishrot.



Ahende yaHatuikulipi, Mbanga Siyomuinji, okwa holola kutya otashi vulika Hatuikulipi a edhililwe mokakuma ethimbo ele, oshoka kape na nande omandhindhiliko gasha kutya uunake taya ka pangulwa.



"Natango kapu na sha sha yela. Esiku lyepangulo inali popiwa natango ishewe ope na omaindilo galwe ga pumbwa okutalika,” Siyomuinji a ti.



Ipinge okwiitaala kutya epangelo olya kala li ilongekidha okuyakomeho nepangulo ndika mo 2021, ashike aatamekwa anuwa oya kala taya kateke oshipotha shika.



“Ngele otaya vulu okukateka epangulo ngeyi manga ye li mokakuma, oshike tashi ningwa po ngele oya pewa ombooloha? Nena epangulo ndika itali ka ya komeho," Ipinge a ti.



Siyomuinji okwa ti omuyakulwa gwe ita kateke nande oshipotha ndika.



"Mbushe miilonga [Ipinge], opamwe nongundu ye, ohaya popi nayi shoka itashi vulu okukolekwa. Otaya kambadhala okupukitha ompangu," Siyomuinji a ti pethimbo lyepulakeno lyomEtitano.







UUMBANGI

Nonande Ipinge okwa ti aayeti yiihokola oye uumbangi tau tamaneke Hatuikilipi notashi vulika ta ka pewa egeelo edhigu lyokweedhililwa mondholongo, Siyomuinji okwiitaala kutya aayeti yiihokolola yepangelo kaye na oshipotha sholela sha kola. Okwa ti ope na omafatululo kuumbangi wa gandjwa kepangelo.

Siyomuinji okwa hokolola kutya Hatuikulipi okwa pewa oshimaliwa kehangano lya za ko Iceland lyoSamherji, omolwa iilonga mbyoka e li longele.

Okwa ti oya li meuvathano lyokugandja omayakulo naHatuikulipi okwa futwa owala.





Omupanguli David Munsu ota ka tokola mo16 gaDesemba.



AATAMANEKWA YOFISHROT MBOKA YA PEWA OMBOOLOHA



Gumwe gwomaatamekwa moshipotha shoFishrot okwa pewa ombooloha. Nigel van Wyk okwa pewa i ifutile mo mondholongo N$20,000 mo13 Desemba 2023.

Eindilo lyombooloha yaRicardo Gustavo olya li lya ziminwa mu Kotomba 2022 mOmpangu yOpombanda yaVenduka, ashike olye ekelwahi kOmpangu yOpombanda.

Gustavo naatamanekwa yalwe moshipotha shoFishrot oye li natango mokakuma mondholongo moWindhoek Central Prison nokwa tegelelwa ya holoke natango mompangu moshiwike tashi ya kepulakeno tali tetekele okupangulwa kwawo.