Nored athilu kombinga yokuza miilonga pakathimbo kwomukuluntupitithi naanambelewa aanene

Pwa piti ngashingeyi omwedhi heyali okuza kokuza miilonga kwopakathimbo kwomukuluntupitithi gwaNored Fillemon Nakashole naanambelewa aakuluntu yalwe yaali, ashike Nored okwa tya thilu kombinga yiizemo yomakonakono.

Omunashipundi gwewilikongundu lyaNored Johannes Uushini okwa holole Namibian Sun oshiwike shika kutya omakonakono ogo oshikumungu shopaumwene shehangano. Okwa tindi wo okutya ko sha komapulo kutya ekutho miilonga ndika otali ka hula uunake. Aanambelewa mbaka yatatu aakuluntu otaya futwa natango nonande ya za miilonga pakathimbo.

“Oprosesa ndjika natango oshikumungu shopaumwene shehangano. Inandi pitikwa kewilikongundu ndi gandje omauyelele ge nasha noshikumungu shika,” Uushini a ti. “Otu na okusimaneka aaniilonga yetu nomauyelele gawo,” okwa gwedha po.

Nakashole okwa kuthwa miilonga pakathimbo kuyele muApilili nuumvo konima ashike yomasiku omashona sho etumwalaka lyokoFacebook ndjoka lya leshwa koyendji notaku hokololwa kutya okwa pewa oombumbo kehangano tali longo pamwe naNored.

Inashi yela ngele omahokololo goombumbo gamwe gomomatompelo ge mu kuthitha miilonga pakathimbo.

Okuza muApilili Toivo Shovaleka oye Omukuluntupithi ta kwathele.



Moondjo

Konima yokuza miilonga pakathimbo kwaNakashole, Omunambelewa omukuluntu gwiiniwe moNored Ndapandula Tshitayi namenindjela gwomayakulo guungomba Petnen Frans nayo wo oya kuthwa miilonga pakathimbo.

Ehangano olya kala lya mwena kombinga yoshikumungu shokukuthwa miilonga kwaanambelewa aakuluntu.

Oonkambadhala odhindji odha ningwa moomwedhi dha zi ko okukwatathana na Nakashole opo a tye ko sha ihe osha hulile muuyengwi oshoka Nakashole okwa ukitha Namibian Sun kuNored opo a tye ko sha.

Pokati mpoka, mu Mai, Namibian Sun okwa kundanekele kutya Nored ota nana nondatu painiwe, omolwa aaniioonga taa landa iipambuliko, oombumbo, okulongitha iimaliwa nayi, okupititha uuyelele kashi shi papitikilo, elongitho nayi lyiihauto yehangano noshowo okulanda iiparte yohauto yombiliha, ayihe mbika oya ningi ombululu miiniwe yehangano enene lyopashitopolwa hali andjaganeke olusheno.

Oodokumende ndhoka Namibia Sun a mwene muMei otadhi ulike kutya mu Januali, aanambelewa yomoNored oya kambadhala opo ya gongele oomiliona N$8.9 momasiku gatatu opo ehangano li fute oondjo dha NamPower.

Oshinyangadhalwa shegongelo lyiimaliwa osha ningwa konima yoomwedhi mbali konima sho ewilikongundu lya tokola opo aanambelewa aakuluntu ya pewe omukuli goomiliona N$4 momasiku 11 Novemba 2023 opo ehangano li fute oondjambi dhaaniilonga.



Iiparte yiihauto yombiliha

Omukanda omule gwa nyolelwa gwaaniilonga ogwa ndjandjukununa nkene iiparte yoohauto yombiliha otayi longitha nuudhigu (painiwe) ehangano,nosho tashi etitha ehangano li nyengwe okufitila oopoloyeka dha simana dhokukalekapo nokwoopaleka omaliko gehangano.

Ehangano olya ti ‘oshimaliwa oshindji' shokukaleka po iihauto yehangano otashi etwa kiiparte yiihauto mbyoka yombiliha mbyoka haya landa kaanangeshefa.

Oshikando shimwe, osha dhimbululwa kutya ongeshefa yoNorthern Electric and Mechanical Auto Repairs oya pula Nored N$27 358 mokugandja nokutula mo oshitenda shopower steerling mo moToyota GD6 2.8 mo2020. Oshikumithi, nuumvo, ongeshefa oya pula Nored N$12 000 molwa okugandja nokutula mo oshitenda shopower steerling natango.

Nonande ondando ya kwashilipalekwa kaanangeshefa yiiparte yoToyota nopower steerling ayike ohayi gu oodola N$30 000.

Omwaalu nguka omushona gwo N$12 000 ogwa za koshimaliwa sha pulwa kongeshefa onkwawo, ndjoka ya pula N$43 000.



[email protected]