Dharani okwa popile okugandja kwe omiliona N$1.5 koSwapo

Omukuluntuwiliki gwongeshefa onene yoRani Group of Companies, Ali Dharani, okwa ti ostola inayi puka mokugandja oomiliona N$1.5 kongundu tayi pangele yi longithwe miikonga yomahogololo.

Okwa ti, ongomukwashigwana nomunangeshefa, oku na uuthemba wokuyambidhidha ongundu kehe yopapolitika yehogololo lye.

Dharani okwi ikala omapopyo gokuhepeka aaniilonga, ta ti kutya omakonakono ogendji gepangelo inage mu mona ondjo yasha.

Swapo okwa li nuulalelo wokugongela oshimaliwa mEtitano lya zi ko okutetekela oshigongi she shokuhogolola iilyo ye mOmutumba gwoPashigwana, nomuulalelo mbuka oomiliona dha konda N$16 odha uvanekwa tadhi ka gandjwa kaakuthimbinga ya yooloka, elalakano okuyambidhidha pashimaliwa iikonga yomahogololo gomuNovemba.

Moshinyangadhalwa shika, ongeshefa yoRani Group of Companies oya uvaneke tayi ka gandja omiliona N$1.5 yi kwathe miikonga yomahogololo.

Ekwatathano

Sha landula oonkundana dhokupewa omagano ngaka, yamwe oya limbililwa nkene ongeshefa hayi fofodholwa tayi hepeke aaniilonga, mwa kwatelwa nomomahokololo gokufuta oondjambi dha nanga nonkalo yiilonga yaa li nawa, ashike ongeshefa otayi vulu okuuvaneka omwaalu gu thike mpoka koSwapo.

“Mwene gwongeshefa yoRani Group of Companies okwa uvaneke ta ka gandja omiliona N$1.5 muulalelo wegongelo lyoshimaliwa shoSwapo ongulohi," Gumwe a nyola koFacebook.

"Ostola ndjino ohayi futu aaniilonga yawo oondjambi dhopokati N$1 200 no N$1 400 kehe komwedhi, shoka hashi dhigupalela aaniilonga ya gwanithe oompumbwe dhawo. Owa tegelela ngiini uuministeli wiilonga mepangelo lyoSwapo wu popile aaniilonga moshilongo?” Gumwe a ti.

Gulwe okwa pula ngele omakwatho ngaka ohaga gumu kokuvula kuuministeli okugamena aaniilonga nuuthemba wawo.

Nehogololo lyokwaatumbulwa kedhina, nakusheka okwa ti: “Omagano goshimaliwa shomiliona N$1.5 okuza kongeshefa yoRani Group otaga ulike nkene ongundu tayi pangele ya kala nokweedhilila mboka taa hepeke Aanamibia aakwawo. Aantu otaya longo moonkalo oondhigu; otaya futwa unene ondjambi dha nanga noonkondo, ashike ngele aahona yawo otaya vulu okugandja omagano goshimaliwa shomiliona kongundu yopapolitika ndyoka tayi pangele oshilongo, owa tegelela ngiini epangelo ndyoka natango li kondjele omauwanawa gaantu mboka taya mono iihuna? Oshiwinayi."

Uuthemba

Sho a kwatathaniwa naye a tye ko sha, Dharani okwa lombwele Namibian Sun kutya okwa kala nokuyambidhidha ongundu tayi pangele okuza mo2005.

Okwa yamukula kutya omahokololo kutya aaniilonga otaya hepekwa kage li mondjila, oshoka omakonakono ogendji ga ningwa kuuministeli wiilonga nokuuministeli wiipindi owe ga yeleke.

Okwa ti eyambidhidho pashimaliwa lyoSwapo itali lalakanene okupewa ookontalaka nenge ootendela okuza kepangelo, ihe okukwashilipaleka oshilongo otashi lelwa kokandidate nokongundu dhingi.

“Ngele ope na omakemo gasha nenge sha shilwe, omakonakono otaga ningwa; uuministeli wiilonga owa ninga omakonakono, uuministeli iipindi niikwafaabulika owa ningile omakonakono. Inatu taaguluka oveta yasha moshilongo," okwa ti.

Okwa gwedha po: “Uuthemba wOmunamibia kehe a yambidhidhe ongundu yopapolitika; ngame omukwashigwana Omunamibia. Uuthemba wOmunamibia kehe okuyambidhidha ongundu ye. Omolwashike omuntu e na okupulwa sho ta yambidhidha ongundu yehogololo lye?"

“Ondi wete uuthemba wandje, wu li pakotampango lyaNamibia, kutya otandi vulu okukwatakanithwa nongundu kehe ndyoka nda hala. Omolwashike nda tothwa mo sho tandi yambidhidha ongundu ndyoka nda hala okuyambidhidha?

“Oshigongi shokuhogolola iilyo yOmutumba gwoPashigwana oshi lile po okuhogolola omuleli dhingi okuza maaleli dhingi, onkene oshiwinayi koshilongo tashi lelwa komuleli dhingi? Ngele ongaanangeshefa otatu kwatha tu hogolole omuleli dhingi ngoka te ke tu lela nenge ta ka kwatela komeho omilandu dhepangelo momimvo ntano komeho, oshi li muuwanawa woshilongo.”

[email protected]