Ookadete 1 193 tadhi tameke omadheulo guupolisi

Ku: Loise Shiimi

Onakuyiwa yopolisi moNamibia oya li ya holoka momutse gwomukweyo mOmaandaha sho Opolisi yaNamibia ya patulula pambelewa Oshikako shotango shOshikondo shEdheulo lyOpetameko lyo-2026/2027 kOkapale kOmadheulo gOpolisi koRuben Danger Ashipala mOndangwa, moshitopolwa Oshana. 

Edheulo olya patululwa pambelewa komutse gwopolisi moshitopolwa shaShana, Komufala Andreas Shilelo, peha lyOmukuluntudjayi gwopokathimbo gwOpolisi, Majola Ndjayi Anna-Marie Nainda. 

OoKadete (Cadet Constables) ya thika po-1 193 ya za miitopolwa ayihe 14 yaNamibia oya ilopota koshikondo shedheulo lyoomwedhi 12. Muyo, 443 aakiintu naalumentu 750, ongundu ndjoka tayi kalele po omazimo gawo, aakwashigwana, nosho wo omategameno neinekelo lyoshigwana ashihe. 

Moshipopiwa she, Komufala Shilelo okwa ti oshituthisaluto shika osha dhindhilike onkatu yotango ya simana meitulomo lyaakwashigwana yowala okuya muugameni yooveta, aagameni yombili, naalongeli yaakwashigwana yaNamibia.

“Inamu taamba owala ompito yiilonga. Omwa yamukula ehiyo lyomudhingoloko omwaanawa. Omwa hogolola okutula iilonga komeho wuuntu woye mwene,” osho a ti.

Komufala Shilelo okwa ti ooKadete oya hogolola ondjila ya dhindhilikwa kiilonga, komulandu, keiyambo nokelongeloyakulo, ya landula moompadhi dhaalumentu naakiintu aanuupenda mboka ya tokolele oonkalamwenyo dhawo mokugamena oshigwana, mwa kwatelwa ependafule ndyoka lya lukilwa okapale hoka, nakusa Komufala Ruben Danger Ashipala.

Okweya dhimbulukitha kutya ka ye li owala tayi ilongekidhile iilonga mopolisi, ihe oya humbata oshinakugwanithwa shopashigwana shokugamena uudemokoli, okukaleka po uuyuuki, okugamena uuthemba womuntu, nokukuutha oveta nomulandu.

Mehololo lyondjokonona, Komufala Shilelo okwa holola kutya oshikando shotango mondjokonona yaNamibia nOpolisi yaNamibia, moka aataambwa taya dheulilwa uupolisi wopetameko ta ya ka pewa oonzapo dhedheulo lyOpetameko lyOpolisi dha ziminwa kEhangano lyOonzapo moNamibia (NQA) pondondo yo-NQF Level 5.  

“Ehumokomeho ndhika otali ulike eitulomo lyetu enene muulongelwe nomepyokoko. Otali ulukilitha eitulomo lyetu lyokuhoya aapolisi mboka kaaye li owala aavuli pamalutu, ihe oya pyokoka wo paulongelwe, ye na uunkulungu wopaiilonga, noya thikama komikalo dhomondjila,” osho a ti. 

Okwa fatulula kutya muule woshikako shomadheulo, aapolisi otaya ka taalela uulongelwe niilongwa oyindji mbyoka tayi ke ya pa uunongo, uunkulungu noondjele dha pumbiwa opo ya longe nawa iilonga yopolisi niinakugwanithwa yopambelewa.

Ihe, Komufala Shilelo okwa kunkilile kutya ondjila kayi shi ompu. Okwa ti otayi ke ya makela moonkondo, meitulomo, momulandu nomomikalo. Ta ya tokelwa inaa ya kotha, omasiku omale taga pula kolutu, omadheulo omadhigu gokolutu, nomamakelo omadhigu gopamadhiladhilo.

“Ethiminiko oha li tungu eitulemo. Omulandu oha gu tungu omikalo. Uudhigu ohawu tungu oonkondo. Nuuiyambi ohawu tungu aaleli,” osho a ti.

Melondodho enene, Komufala Shilelo okwa kunkilile aataambwa yaaha holeke uuvu kehe nenge yiiningithe uundjolowele wiihwapo, ta kunkilile kutya otashi vulu okutula oomwenyo dhawo moshiponga.

“Edheulo lyopolisi ohali piti momadheulo omagdhigu nongele owu na uunkundi ngashingeyi, tseyithila omudheuli gwoye. Ino limbililwa, opu na iilonga yilwe to vulu okukutha,” osho a ti.

Okwa indile omuolisi kehe e na uuvu a popye meendelelo, ta tsu omuthindo kutya uushili otawu vulu okugamena omwenyo gwomuntu.

Okwa pandula wo uuwiliki wOmukuluntu gwOkapale kOmadheulo, Komufala Peha Roseline Uahindua, nehangano lye lyaaniilonga, mboka ye na oshinakugwanithwa shokulundulula aakwashigwana yowala okuya metanga lyopolisi.

Okwa indile aalongi ya longe iilonga yawo pauulongelwe, pauyuki, meitulomo nopaukwahenda, noya kale aalongidhingi, aawiliki yomikalo omiwanawa naiiholelwa tayi opalele okulandulwa.

Mehulitho, Komufala Shilelo okwa pe aapolisi oshinakugwanithwa shokulonga nesimaneko, okuwilika pauyuki nokugamena nomukumo.

“Uvitheni uukwanezimo weni uuntsa, uvitheni etanga lyopolisi uuntsa, nuunene tuu, uvitheni Namibia uuntsa ,” osho a ti, sho a tseyitha mepatululo lyopambelewa lyomadheulo.

Ya tolokwa ku: Gottrieb Nambahu ([email protected])