Imalwa ta ti Epangelo olina "uumbangi wa gwana" okukondjitha De Klerk

Ku: Sonja Smith

MuFebuluali, epangelo olya ti kutya otali manitha eindilo epe lyetumoko opo li shunithe hahende omufadhukipo Maren de Klerk koNamibia konima yokumanitha omakonakono galyo shi na sha nekwatelomo lye moshikonga shoFishrot.

Mombapila ya gandjwa kOmpangu yOpombanda mugatano gaFebuluali, Omutamanekindjayi gwopokathimbo Martha Imalwa okwa ti Epangelo olya hala De Klerk a shunithwe okuza moSouth Africa opo a taalele iipotha yiimbuluma. 

“Ongundu yomakonakono oya mona uumbangi wa gwana opo yi koleke elalakano ndyoka shi na sha nekwatelomo lyomwiindili miipotha mbika, mbyoka ya tegelelwa yi etithe omatameneko ogendji,” ombapila osho tayi lesha ngeyi. 

“Epangelo pethimbo ndika otali manitha eindilo lyegaluko opo li kwashilipaleke egaluko lyaDe Klerk opo a tulwe pambelewa miipotha mbyoka tayi tulwa mo,” Imalwa a ndhidhilike pethimbo ndyo.

Eindilo lya zile ko lyokushunitha omufadhukipo olya li lya shunithwa komukuluntuwiliki gwomapangulo gopashigwana gwaSouth Africa momasiku 19 ga-Juni 2024 omolwompumbwe yomikanda dhopambelewa. 

De Klerk, ngoka a li hahende moVenduka, okwa li a wilike Seaflower Pelagic Processing, elongelokumwelonga lyehangano lyoNational Fishing Corporation of Namibia (Fishcor) noAfrican Selection Fishing. 

Okwa thigi po Namibia muJanuali 2020 konima yokupulapulwa kopolisi nokoOkomitiye Yokukondjitha Uulingilingi mekwatathano netaagulukompango lyoFishrot, sigo oompito ndhika ina galuka. 

Pethimbo lyenyanyangidho, Namibian Sun kaya li ya vulu okukoleka kutya sigo openi pwa hulile eindilo nankene omulandu gwetumoko gwa huma komeho okuza pombapila yaImalwa yaFebuluali, nongele oku na iipotha ya manithwa mekwatathano naDe Klerk. 

Oompata dhoomiliyona N$1.3

Omatseyitho gaImalwa oga kwatelwa moompata dhopaveta dhopenzela yaDe Klerk yoomiliyona N$1.3, ndjoka ya kwatwa po kOpolisi yaNamibia muJuni 2024.

Ombapila ye ya tulwa mo okuyambidhidha ngoka a li Omukuluntudjayi gwOpolisi yaNamibia, Joseph Shikongo, ngoka ta pataneke eindilo lyaDe Klerk opo ekwato lyiimaliwa mboka li tseyithwe kutya kasha li paveta.

Oshipotha osha pulakenwa kOmpangu yOpombanda mOmandaha ihe osha undulilwa komasiku 16 gaNovemba omolwomuthika gwokukondjithathana konima sho hahende gwEpangelo, Jabulani Ncube, a tseyitha kutya okwa ipyakidhila noshipotha shilwe pethimbo olyo tuu ndoka. 

Omuthika nguka otagu tsikile komeho gwOmuwiliki Peha gwOmupangulindjayi Hannelie Prinsloo. 

Openzela yaDe Klerk, ndjoka yi li moSanlam Namibia, oya adhele oshikako shomagandjo momasiku 1 ga-Juni 2024, mpoka a kunkilile ehangano lyomishangwalandu li lundululile iiyemo kokambo ke kombaanga yoAbsa moSouth Africa.

Konima yomasiku gatano, momasiku 6 ga-Juni, Opolisi yaNamibia oya pititha etseyitho lyekwatopo lyomaliko pakatendo 28(1) kOmoveta yokukondjitha iimbuluma yaunganekwa (POCA), mbyoka ya imbi elundululo ndyoka.

De Klerk okwa kongo ekwatho kOmpangu yOpombanda muFebuluali 2025, ta popi kutya ekwatopo olya taaguluka okatendo 37A(1) kOmoveta yOshiketha shoPenzela, ndjoka tayi gamene uuwanawa wopenzela komakwatopo gamwe gopaveta.

“Kape na elongitho lyoonkondo dha uthwa paveta kOpolisi kohi yoPOCA,” De Klerk a ti mombapila ye.

Okwa hala ompangu yi tseyithe kutya ekwatopo ka lya li paveta nota indile emangululo lyiimaliwa ye yopenzela.

Omuthika gwomufadhukipo

Epangelo otali pataneke oompata dhe, tali popi kutya openzela ka ya li we ya gamenwa momukalo ngoka ta popi ngele oya huma noya pumbwa okufutwa.

Otali popi wo kutya elundululo lyiimaliwa koSouth Africa otali vulu okutula iimaliwa mpoka inaa yi adhika koompangu dhaNamibia.

Imalwa okwa tsikile ta popi kutya okatendo oka-99 kOmoveta yokukondjitha iimbuluma yaunganekwa (POCA) otaka imbi De Klerk okukonga ekwatho kompangu methimbo e li onga omufadhukipo.

Okwa indile Ompangu yOpombanda yi ekelehi eindilo lyoshimaliwa.

Imalwa okwa ti Epangelo olya longekidha iinyangadhalwa yekwatopo pamwe nomangambeko gokushunitha De Klerk, nelalakano lyokugamena eliko ndyoka tali vulu okukuthwa ko ngele okwa monika ondjo.

“Edhikalo kehe meindilo lyekwatopo oli li oshizemo shomuthika gwomwiindili ongo omufadhukipo, nuudhigu wonkalo yekwashilipaleko lyeholoko lye a taalele iihokolola,” osho a tompele.

MuJuuli, Ompangu yOpombanda oya gandja elombwelo lyekwato po lyiinyangadhalwa ya tengenekelwa poomiliyona N$75.3 mbyoka yi na sha naDe Klerk nehangano lye, Celax Investments Number One.

Nonando omakonakono oga manithwa, De Klerk ina tulwa mo miipotha mbika apambelewa moNamibia.